Vawiin khan Champhai DC Office Strong room-a Electronic Voting Machine (EVM) kawllai Ballot Unit, Control Unit leh VVPAT 11 theuhte lakchhuahna leh endikna neih a ni a. EVM leh VVPAT te hi Mizoramin kumina inthlanpui a hmachhawn tur atana tih niin, a hman dan leh hriatngaite mipuite hnena a zau thei ang bera zirtirna neih anih dawn vanga lakchhuah a ni a. Naktuk atangin EVM leh VVPAT hman dan zirtirna campaign hi neih tan a ni dawn a, Hmunhmeltha, N.Khawbung, Awmpui phei, Bethel Kawn, Govt. Champhai College leh GM. Higher Secondary School-ah te bultan tum a ni a. Karleh Thawhtanni atangin Champhai District chhunga Assembly Constituency hrang hrang 5 hnuaia Polling Station 137 awmte tuam chhuaka campaign hi nei tura ruahmanna kalpui a ni.   

Pu Lalremruata Kullai, Election Officer, Champhai District chuan Election Commission of India thupek angin Election kaihhnawih thiltih reng rengte chu langtlang leh dik taka kalpui zel tum anih thu leh hemi kawnga political party awiawhte tawiawm thinnaah lawmthu a sawi a. A zau thei ang bera mipuite hnena EVM leh VVPAT hman dan zirtirna neih tum a ni tiin, hemi atan hian District chhunga Polling station zawng zawng tlawhchhuah tum a ni, a ti a. Mipuite zirtirna tura hman tur EVM leh VVPAT Set 11 thlanchhuahte chu First Level Checking neih zawh taka endik vek tawh a nih thu a sawi a. Heng EVM leh VVPAT set 11 te hi inthlan hunah chuan hman anih ve tawh dawn loh thu leh inthlan hunah chuan vawiina lakchhuah ve loh endik vek tawhte chu hman a nih tur thu a sawi bawk a. Heng bakah hian inthlan hmaa thil tih tur leh inpuahchahna hrang hrang awmte a sawifiah bawk a ni. 

EVM tharte hi Electronics Corporation of India Limited (ECIL) siam a ni a. ECIL EVM te hian August Ni 9, 2018 zan khan Champhai lo thlengin endikna hmasa ber First Level Checking chu August Ni 29-31, 2018 chhung khan neih a ni a. He hunah hian Ballot Unit 205, Control Unit 183 leh VVPAT 182-te enchhinna Mock Poll chu ECIL Engineer, Champhai District Election Official leh Political party aiawhte’n an lo nei tawh a ni.

Vawiin EVM leh VVPAT lakchhuahna leh endikna hunah hian DC Office Election Branch Staff, Security Personel leh Political party aiawhte an tel a ni.