No.4065/2020-2021

Dated Champhai, the 13th August, 2020: Covid-19 hri leng mek laka Champhai district mipuite him tlanna tura Champhai Bawrhsap Pi Maria C.T Zuali thuchhuah No. J.11019/1/2020-DC (CPI) dated 10th August, 2020 bawhzuina kalzelah vawiin khan Champhai khawpui chhunga Sumdawng Wholesaler/distributor leh Mutia/porter-te CMO Office kaltlangin Rapid Antigen Test (RAT) tihsak an ni.

Rapid Antigen Test hi Tourist Lodge Champhaiah neih niin, vawiin hian Champhai khawpui chhunga Sumdawng Wholesaler/distributor mi 20, Mutia/porter mi 17 te bakah frontline worker 2, an vaiin mi 39 te Nasal Swab Sample lain Rapid Antigen Test tihsak an ni a, an result a negative vek a ni.

Heng bakah hian August ni 1 atanga ni 10 inkara Sairang leh Sihphir pela kal Driver/handleman zawng zawngte leh Essential Commodities August ni 10, 2020 atanga Champhaia lo phurluttu Driver/handleman-te, Vairengte test paltlang lo te tan Rapid Antigen Test (RAT) tihsak tura ruahman niin, a chunga tarlan hun chhung leh hmun tlawhtu Rapid Antigen Test tih ngai Driver-te chu Dr.Lallawmkima, DIPRO Champhai, Phone No- 8974138751/8413061613 ah in report tura hriattir an ni bawk.

Covid-19 vei leh vei loh endikna Rapid Antigen Test (RAT) hi Champhai district-ah July Ni 22, 2020 atanga hman tan a ni a. RAT hmang hian vawiin ni thlengin mi 150 te endik ni tawhin, heng zinga mi 4 te chu Covid-19 an vei tih finfiah a ni.