No.4066/2020-2021

Dated Serchhip, the 13th August, 2020: Vawiin hian VIllage Council Election 2020 atana Serchhip District Observer tura SEC in a ruat Pu Robert C. Lalhmangaiha, MCS, Deputy Secretary, SAD chuan DC Conference Hall ah Political Party aiawh, tlawmngaipawl aiawh, Media mite leh MPF aiawhte nena inkawm hona a buatsaih a. VC inthlan thianghlim leh hlawhtling a awm theih nana thawhpuiah a sawm.

Pu Robert C. Lalhmangaiha chuan, ram inrelbawlna lungphum pawimawh, village level a sawrkarna siam tura kan inpuahchahnaah Serchhip District a thawktute chu mit an tlung hle a a hriat thu sawiin, District Election Office inbuatsaihnate, tun thlenga a tlawh tawh chin Hrangturzo biala khaw hrang hranga inbuatsaihna te chu a tha tawk hle nia a hmuh thu a sawi a ni. Observer hian he huna pawl hrang hrang aiawhte a koh khawm chhan chu thil dang nilovin, he inthlan lo awm turah hian fel fai leh thianghlim taka inthlanna a awm theih nan thawhpuiah ka sawm che u a ni, tiin inkawmna a buatsaih chhan a hrilh a ni. Covid19 hripui laka kan him theihna tura sawrkar ruahmanna te zawm that a tul thu pawh tarlangin, inhlat tawka awm (social distancing) te, hmaituamna vuahte, Kut sil uar te a pawimawh reng thu sawiin, inthlanna hmunah pawh Election Commission ruahmanna in Sanitizer chhawp vek tum a nih thu a tarlang a ni. Hrangturzo biala khuate a tlawh deuh vek tawh thu a sawi a, karleh lamah Tuikum bial lam tlawh kual a, inthlan karah Serchhip bial tlawh kual vek a tum thu a hrilh a, mipui inthlan chungchanga amah be duhte tan a phone Number 9485114964 leh 9862648914 bakah a Liason Officer Pu Raltawnkima Colney phone Number 9862552510 ah te engtiklai pawha biak theih an nih thu a sawi bawk.

Observer in thu a sawi zawh hian kal khawm ten zawh duh an neih leh rawtna an neih hrang hrangte zawhna hun leh sawina hun an hmang a. An zawhnate chu Observer leh amah tawiawmtu Pu Vanlalhmachhuana, EO (Asst. DEO) ten an chhangin an sawifiah a ni.

He hunah hian Serchhip District NGO Coordination Committee hruaitute, MPF hruaitue, Media mite leh Political Party aiawh hrang hrang te an tel a ni.