No.4067/2020-2021

Vawiin khan Secretariat Conference Hall-ah State Level Working Committee for Celebration of Teachers' Day chu School Education Minister Pu Lalchhandama Ralte hovin an thukhawm a, September ni 5, 2020-a Teachers' Day hman dan tur an sawiho. Meeting-ah hian Kumin Teachers' Day chu COVID-19 avanga School kal theih loh lai anih avangin naupangte nen puipunna siam lovin hman nise tih rel a ni.

Minister Pu Lalchhandama Ralte chuan Teachers' Day chu ram pum huapa ni pawimawh, ram hruaituten thuchah an sawi thinna a ni a, kuminah School kal theih loh anih tak avangin kum dang anga hman theih ani lo chu pawi a tih thu a sawi a. A theih chin chinah zirtirtute zahna leh chawimawina lantir tha a tih thu a sawi a. Kumdang anga he ni hman theih loh chu Pathian remruatah ngaiin, kum dangah an phu ang ngeiin ropui zawkin kan la hmang leh thei ngei ang tih beisei ang u a ti a.

Meeting-ah hian kum danga lo tih thin angin Teachers' Day pualin Chief Minister leh School Education Minister te chibai bukna chanchinbu-ah chhuah ni se, School Education Minister-in Teachers' Day thuchah sawi se, TV ah leh All India Radio Aizawl leh FM channel-ah te puan chhuah ni se. District tina khawpui lian zualah te uar zawkin he ni pual hian banner tar nise, Zirtirtu natna khirhkhan tuarte tanpui nan zirtirtuten thawhlawm thawh leh nise. Zirlai naupangte erawhchu thawh tir loh nise, tih rel a ni.

Meeting-ah hian School Education Minister bakah School Education Commissioner & Secretary Pi Esther Lalruatkimi, Aizawl DC te, School Education Director leh Officer te, Zirtirtu pawl hrang hrang President te, DDK leh AIR hotute an tel a ni.