No.3066/2020-2020

Kumin Village Council inthlan tur inpuahchahna kalzelah vawiin khan Champhai District Election Officer Pi Maria C.T Zuali hovin Summary Revision of Village Council Electoral Roll 2020 kalpui chhunzawm tur chungchangah inrawnkhawmna hun DC Conference Hall-ah neih a ni.

Pi Maria C.T Zuali chuan Electoral roll dik leh felfai nei tura tanlak angaih thu sawiin, hemi tur hian kan zavaia thawhhona leh venpuina a ngai takzet a ni, a ti a. Electoral Roll dik leh thianghlim tak nei turin Roll-a chuang tur leh chuanglo turte felfai taka thliar anih theihna turin hmalak ho a tul thu a tarlang a. District Election Officer chuan Electoral Roll puahchah kawngah dik lo leh felhlel taka ti lo tur leh lehkha pawimawh tulte ngaipawimawha chumi zulzuia dik taka kal angaih thu a sawi a. Inthlang ram kan nih angin inthlan kaihhnawih thilah a tihdan phung hre zawk ten midangte zirtira kawhhmuh kawngah theihtawp kan chhuah tlan zel angai a ni,a ti bawk.

Pu Mark Lalthanliana, Addl DC Champhai chuan VC Electoral Roll-ah Mizoram mi leh sate chauh an chuang dawn avangin hnamdang district chhunga awmte erawh paih an nih dawn thu a sawi a. Electoral Roll endik huna NGO te puihbawm tawhnaah lawmthu sawiin, hmabak awmahte thahnemngai taka Official-te thawhpui turin a ngen a. Dilna lut angte ngun taka ngaihtuah ho anih tur thu leh Roll revision chu ram leh hnam chhanna kawga pawimawh tak anih angin, dik taka kal pui angaih thu a sawi bawk.

Pu Lalnunfela Chawngthu, Election Officer chuan lockdown vanga VC inthlan sawn anih thu sawiin, VC inthlan tur Draft Roll chu kumin February thlaa tihchhuah tak MLA Final Roll behchhanin, March Ni 13,2020 a tihchhuah anih thu a sawi a. District thar anga inthlan anih tawh dawn avangin MLA Constituency pathum East Tuipui, Champhai South leh Champhai North ah te VC inthlanna buaipui anih dawn thu a sawi a. VC seat chu chenna In awm zat atanga chhut anih thu sawiin, VC neih zat tipung thei anih avangin In awm zatin kawngro a sut thui hle thu sawiin, endik hunah fimkhur angai hle a ni, a ti a. July Ni 29,2020 a VC Electoral Roll thar ber tihchhuah anih hnuah VC inthlan buaipui turin training leh tul dangte chak taka bawhzui ani tawh ang, a ti bawk.

Summary Revision of Village Council Electoral Roll 2020 kalpui mek hnuaiah March Ni 13, 2020 khan Draft Electoral Roll tlangzarh a ni a. March Ni 14 atanga 18, 2020 thleng khan Roll-a luh dilte tan hun hawn ani a. Rokhawlhna vanga hmabak awmte kalpui chhunzawm thei lova tihtawp anih hnuah, State Election Commission thurawna chhunzawm leh a ni a, naktuk July Ni 15 atanga 21, 2020 thleng hian dilna lutte hearing hmanga endika siam fel hman tum a ni a. Ruahman dan chuan July Ni 22 atanga 28,2020 chhung hian Electoral Roll te chhutchhuah vek hman tum niin, July Ni 29,2020 hian Village Council inthlan huna hman tur Final Electoral Roll chu tlangzarh tum a ni.

Summary Revision of Village Council Electoral Roll 200 kaltlanga Draft Roll kumin March Ni 13 a tlangzarh takin a tarlan dan chuan Champhai district ah Voter 50387 (Male-24663, Female-25724) an awm a. Assembly Constituency bikah chuan 23-Champhai North A/C ah Voter 16263 (Male-7865, Female-8398), 24-Champhai South A/C Voter 18992 (Male-9182, Female-9810) leh 25-East Tuipui A/C ah Voter 15132 (Male-7616, Female-7516) te an awm mek a ni.

Tun dinhmunah Champhai district-ah Village Council 62 awmin, VC thar pahnih Champhai Jail Veng (Kanan VC atangin) , Ruantlang Mual Veng (Ruantlang VC atangin) te an awm a. Village Level Officer (VLO) theuhte mahni bial chhungah Village Level Standing Committee dina Electoral Roll felfai tak siam kawnga hmalak thin a ni a. Champhai North Assembly Constituency atangin Neihdawn, Ngaizawl, Tualpui, Rabung leh Aiduzawl-te chu Khawzawl District-a an beh tawh avangin Khawzawl District Election buaipui tuten an vil tawh dawn a ni.

Vawiin meeting-ah hian ERO, AERO, Political party aiawh, NGO hotute leh Media te an tel a. Meeting zawh hnu hian ERO leh AERO te pualin training neih a ni.