No.3067/2020-2020

Aizawl West-I bial a awm, Lungverh Area-a 5th IR Bn. Hqrs. chhunga awm NDRF mi leh sa mi 26 laiin Covid-19 an positive avanga Lungverh khawtlangin harsatna an tawh mek chungchangah Manpower Development Board Vice Chairman leh Aizawl West-I bialtu MLA ni bawk Pu Zothantluanga chuan nimin July ni 13, 2020 (Thawhtanni) khan Lungverh a tlawh.

Nimin a Lungverh a tlawhna hian Lungverh mipuite chu thlamuanin, amah lo dawngsawngtu Lungverh khawtlang hruaitute hnenah, an khawtlanga thil thleng chu pawi a tihpui thu leh, NDRF mi leh sa Lungverh a la awm te la chhuak tura khawtlang mipuite ngenna pawh tihhlawhtlin a nih theih nana a theih ang anga hma a lak nghal thu te a sawi a. Lungverh mipui atanga Swab Sample an lak te pawh, Pathian zarah an negative ngei a beisei tih a hrilh a ni.

Bialtu MLA Pu Zothantluanga ngenna ang hian tukin July ni 14, 2020 zing dar 10:00 khan, heng NDRF mi leh sa, Lungverh a la awm mi 5 te chu Sorkar Quarantine Centre-ah dah luh nghal an ni.

Nimin a Lungverh a tlawhnaah hian Bialtu MLA Pu Zothantluanga hi Aizawl District Addl. DC leh Doctor thenkhat ten an tawiawm a. Pu Zothantluanga hian Lungverh khawtlang tan hian Buhfai bag 4, Alu Bag 2, Dal bag 2, Purun Sen bag 1 leh Tel Case 2 a pek bakah, Hmui tuamna leh hri thahna hlo engemaw zat a pe bawk a ni.

July ni 12, 2020 (Pathianni) pawh khan Luangmual vengah, tun hnaia ruah sur avanga Aizawl Law College kawmthlang leimin leh Pu Chawngkunga kawmthlang leimin pawh tlawhin, leimin avanga an harsatna tawh mek te chu a hmunah a enpui a. Leimin khuhna atan hian Luangmual khawtlang hruaitute hnenah Silpauline 10 a lo pe tawh bawk a ni.