661/2022-2023
Champhai, the 27th May, 2022: Vawiin khan Mizoram Sawrkar Planning & Programme Implementation Department leh District Planning Committee tangkawp bultumin DPRC Auditorium-ah Champhaia Sawrkar Department hotute leh thawktute, VC, Loneitute leh College Zirlaite tan hmasawnna tluantling leh ngelnghet a awm theih nana hmalak dan tur inzirtirna 'Workshop on Implementation and Monitoring of Sustainable Development Goals (SDGs)' buatsaih a ni. SDGs Workshop huaihawt hi District Planning Committee Chairman Pu James Lalrinchhana, District Bawrhsap chuan a telpui a ni.

Pu James Lalrinchhana chuan Planning & Programme Implementation Department leh District Planning Committee-in Champhaia training pawimawh tak an buatsaih chu lawmawm tiin, a hlawhtlin theihna kawnga tha thawhtute leh mi pawimawh tak tak kalkhawmte chu fakawm a tih thu a sawi a. Sustainable Development Goals puitlin a nih theih nana pawimawh leh innghahnate sawizauin, chhuan lo la awm zel turte hmakhua ngaihtuah chung leh an buai phah lohna tura hmasawnna chawl lo, kal reng tur chhawpchhuah chu Sustainable Development Goals tum bulpui ber a ni, a ti a. Hun reilote chhung maiah thil a inthlak danglam zung zung thin avangin khawvel thang leh hmasawn mek zel karah ngaihtuahna fim tak senga hmalak leh hmachhawp siam thiam a tul thu te a tarlang bawk.

District Bawrhsap chuan Sustainable Development Goals 17 siamte chu ram hrang hrangte thawhhona leh inlungrualna avang chauha tihpuitlin theih a nih thu sawiin, mimal tin, a te ber atanga intanin mahni tihtur theuhte kan hlen chauhin kan ti hlawhtling thei dawn a ni, a ti a. Kan chenna leh a velte, nungcha leh ramngawte humhalh chung zela hmasawnna kalpui chu nakin thlenga pawimawh tur a nih thu leh mamawh tawk chauh hmanga, a awmsate tihpun zel kawnga hmalak a tul thu a sawi bawk a. Kalkhawmte chu SDG thiltumte tihlawhtlingtu ni thei tura training tha tak nei tur leh, Champhai District sik leh sa nuam, mawi leh mite tlawhchak vawnhim zel tum turin a chah a. Hmasawnna tluantling neih theih nan Zirna in, Kohhran leh remchang apiangah zirna pawimawh zia inzirtir thar a tul a ni, a ti bawk a. Hmasawnna tluantling leh awmze nei, nakin zela nghawng thalo siamlo tur leh chhawr tangkai theih tur siam kawngah tanlak a pawimawh thu tarlangin, he huna tel District chhunga Department hotute leh khawtlang mirawn hrang hrangte chu tha taka mithiamte thusawi ngaithla turin a chah a. Kalkhawmte chu midang leh district tana malsawmna nih tum theuh tura chahin, workshop chuan awmze thui tak a neih ngei a beisei thu a sawi bawk.

He hun hi Pu C.Lalnghakliana, District Research Officer (DRO) & Member Secretary, District Planning Committee Champhai chuan kaihruaiin kalkhawmte inhmelhriattirna a nei a. Dr. C. Vanlalzawna, Consultant, SDG, Planning & Programme Implementation Department chuan kalkhawmte zirtirna a pe a. Sustainable Development Goals awmzia leh tehfung hrang hrangte, Sustainable Development Goals pawimawhna leh tihhlawhtlin a nih theih nana hmalak tulte a sawifiah a ni.

Zawhna leh chhanna hun hman a nih hnuah Pu C. Lalnghakliana, District Research Officer chuan lawmthu sawiin workshop hi a khar a ni.

Sustainable Development Goals (SDGs) hi kum 2015 a United Nations General Assembly neih tuma member ram 193 ten lungrual taka thuthlung an ziah, khawvel ram hrang hrangte'n hmasawnna ngelnghet an neih theih nana kum 2030 hma ngeia hmasawnna thlen tum chin thiltum 17 te sawina a ni a. Sustainable Development Goals 17 tarlan zingah hian retheihna leh tam tuarna umbo, hriselna, zirna tha leh intluktlanna siam, tui thianghlim leh faina, ei leh bara hmasawnna thlen, sik leh sa danglam chak lutuk tur ven, remna, muanna leh dikna tungding tura hmalak, kan chenna leilung leh a chhunga chengte humhalh bakah tum ram thleng tura thawhhona tha neihte chu a tum langsar zual an ni.