662/2022-2023
Aizawl 27th May 2022: Vawiin khan Cooperation Minister Pu C Lalrinsanga’n Mizoram Co-operative Apex Bank Ltd. (MCAB), ITI Branch leh ATM thar a hawng a. Hawnna inkhawm hi ITI Veng YMA Hall ah neih a ni.

Minister Pu C Lalrinsanga chuan MCAB ITI Branch hawn a ni ta chu lawmawm a tih thu sawiin ITI veng mipuite tan malsawmna a nih ngei a beisei, tih a sawi a. Bank chu kan pawisa neihsa him taka min kawlsaktu leh peipungtu, loan hmanga kan mamawh pur kan chawkna hmun a ni, a ti a. He bank hi a than chuan veng chhung mipuiten malsawmna kan dawng anga, mi harsa zawk dinhmun siamtha tur pawhin a tangkai dawn a ni, a ti. Loan kan lak hian a rulh leh lam ngaih pawimawh a tul a, kan loan lakin hrinchhuah leh tharchhuah a nei dawn em tih ngaihtuah chungin loan kan lak a ngai tih hre thar leh turin Minister chuan mipuite a chah a ni.

Cooperation movement chungchang sawiin khuallian chuan cooperative movement a nihna ang taka kalpui thei ram apiangin hma an sawn a, ei leh barah an intodelh a, ram a changkang thin, a ti a. Pathianin mihringte hi intanpui tawn turin min siam a, kohhran hmasa ber a din pawhin kohhran inrelbawlnaah cooperative movement hi an bilh tel daih tawh a ni, a ti. Cooperation Minister Pu C Lalrinsanga chuan Cooperative Movement hi thuang hrang hrangin a kal a. Credit society hnuaiah MCAB leh MUCO bank te awmin, Cooperation hnuaia society dang ten chak an lakna tur atana din a ni a, pur kan chawkna tur a ni, a ti.

Apex Bank ITI Branch hawnna inkhawm kaihruaitu Mizoram Cooperative Apex Bank Ltd. Chairman Pi T Lalmuanpuii chuan ITI Branch dinna turin khawtlang hruaitute nen hma an lak bakah ITI veng chhunga Cooperative Society intelkhawm ten an thawhhlawk hle tih a sawi a. A hmun tur atan Local Council ten ram an pe a, a sakna sum hi Apex Bank hian a tum a ni. Pi T Lalmuanpuii chuan MCAB-in hmasawnna hrang hrang a tawn chhoh mek sawi langin, a dinhmun that lai ber a tawng chho, a ti a, kumin chhung ngei a scheduled bank a nih hman a beiseiawm thu a sawi bawk a ni.

MCAB ITI Branch hawn tak hi Apex Bank branch 23-na a ni a. Aizawl khawpui chhungah Branch 12 neiin Aizawl pawnah branch 11 an nei mek a ni. Minister in ATM booth a hawn tak hi 23-na a ni a, mobile van ATM 2 nen a vaiin 25 an nei a ni.

Vawiin program ah hian ITI Veng Local Council aiawh te, Cooperative Society aiawh te pawhin thu an sawi a. MCAB CEO Pu Lalzuahliana’n lawmthu sawiin hun hnung a khar a ni.