663/2022-2023
Aizawl, the 27th May 2022: Governor Hari Babu Kambhampati leh Pi Darshana Jardosh, Union Minister of State for Railways te chu vawiin chawhma khan Raj Bhavan-ah an inkawm a. He hunah hian North East Frontier Railways (NFR) in KM 51 a thui Bairabi – Sairang Rel Kawng a siam mek a hmasawnna leh hmachhawp dang te an sawi dun a ni.

NFR hotulu ber te leh Rail India Technical and Economic Service Limited (RITES Ltd) hotulu ber te pawh he meeting-ah hian an tel a. NFR lam hian Video hmangin Bairabi – Sairang Rel Kawng hnathawh mek leh thlen chin te lan tirin an sawi fiah bawk a. RITES Ltd hotute lam atangin Relkawng leh Rel Station a awm ngei ngei tur thil pawimawh te, a siam dan tur chungchang leh a siamna tur sum dap theihna kawng hrang hrang te ngaihthlak a ni bawk a ni.

Governor Hari Babu Kambhampati chuan Pi Darshana Jardosh, the Union MoS of Railways hnenah Mizoram tana Rel Kawng pawimawh tak siam hna tha taka thawh a nih avangin lawmthu a sawi a. Mizoram mipuiin he Rel Kawng hi chhawr tangkai hlan an nghahhlelh tawh thu te, kum 2023 kum tawpa siam zawh a nih hman loh pawhin March 2024 chuan siam zo ngei tura theihtawp chhuah chhunzawm turin a ngen nghal a ni.

Governor chuan Rel Kawng Mizoram chhunga a rawn luh tak tak hunah chuan sum leh paiah Mizoram dinhmun a rawn thlak danglam dawrh dawn tih a sawi a. Tunah Aizawl leh Silchar inkar kalna atana khualzin pakhat senso Rs 1000 chuang emaw chu Rel a awm hun chuan Rs 100 velah a tla dawrh dawn a. Aizawl leh Silchar inkara darkar 6 chuang hun khawhral thin chu Rel hmang chuan Darkar 3 aia tlemah a tla thla dawn a. Bungrua leh Passenger phurhna man nasa taka tlawm zawk leh zin hun nasa taka pawh tawi chuan danglamna leh hmasawnna a thlen tur chu a lian tham hle dawn a ni a ti.

Pi Darshana Jardosh, the Union MoS of Railways pawhin Mizoramin hun reiloteah Rel Kawng tha tak a nei tur chu a lawmpui takzet tih a sawi a. Relkawng te, KMMTTP, Border Trade centre te leh National Highways te chu project inthlunzawm vek a nih thu a sawi a. Heng project te hi hun reiloteah a puitling vek dawn a, hemi hunah chuan Mizoram chu Sumdawnna hmunpui leh sumdawnna kawtchhuah a ni dawn a ni a ti. Railway Minister chuan Sairang atangin Mizoram chhim lamah Relkawng siam tum a ni a; chumi atan chuan Survey pawh neih a ni a ti bawk.

Pu Anshul Gupta, General Manager, NFR, Pu Rahul Mithal, Chairman & Managing Director, RITES Ltd, Pu SS Yadav, CAO (const), NFR, Pu Vinod Kumar, Chief Engineer, NFR leh Pu CL Sah, General Manager, RITES te pawh he meeting-ah hian an tel a. Pu Anshul Gupta, General Manager, NFR in report a pek dan chuan Sairang Railway Station chu an sa zo tep tawh tih a sawi a; Sairang Rel Station chu ‘Rel Station Changkang tak’ atan buatsaih mek a ni a. Sak zawk hunah chuan Khualzinmite thlenna tur Hotel tha leh thlen man tlawm te, Hospital te, Khualzinmite mamawh service hrang hrang leh Railway a thawkte leh helai chhehvela cheng mipuite hman tangkai tur hmasawnna ruhrel thenkhatte pawh he station huam chhungah hian siam a ni dawn a ni a ti.