4582/2023-2024

Champhai, the 15th April, 2024: Vawiin chawhma dar 9:30 khan District Election Office, Champhai leh Champhai District Basketball Association (CDBBA) tangkawp chuan Champhaiah election kaihhnawih hriattur pawimawh leh vote thlak tura inzirtirna, Systematic Voters' Education and Electoral Participation (SVEEP) Street Campaign an buatsaih.

He hun hmanpuia SVEEP Street Campaign hawngtu District Election Officer Pu James Lalrinchhana chuan MLA inthlanpui ang bawkin MP inthlanpui chu ngaihpawimawh a tul thu sawiin, tun hma zawng aia vote tla zat a san theih nan vote nei zawng zawngte chu an vote hlu tak thlak theuh turin a ngen a. District mipuite chu vote thlak niah thil dang zawng aia vote thlak ngaipawimawh hmasa theuh tura chahin, district dangte tana entawntlak, vote tlak thatna district siam kan tum tur a ni, a ti a. Thalai rual infiammi kalkhawmte chu taksa, rilru leh thlarau nun hriselna ngaipawimawh tura chahin, inthlanna muanawm, felfai leh hlawhtling tak buatsaih a nih theih nana midangte zirtirtu leh entawntlak nih tum turin a fuih nghal bawk.

A hawnna pual hun tawi hman zawh hnu hian Selluaia Traffic Point, Champhai Venglai atanga Darthangvunga Traffic Point, Champhai Vengthlang thleng kawngzawh a ni a; aurinna hmangin mipui hnenah vote thlak pawimawhna leh vote thlak vek tura sawmna siam a ni a. Darthangvunga Traffic Point-ah vote thlak tura intiamkamna 'Voters' Pledge' Dy. DEO Pu K. Zorammuana kaihhruaia sawi rual niin hun hman hi khar a ni.

He hunah hian District Election Official-te leh  Champhai District Basketball Association (CDBBA) hnuaia nziaklut Club hrang hrang member-te an tel a ni.