199/2024-2025 

Champhai, the 15th April, 2024: Kumin Lok Sabha Inthlanpui atana EVM/VVPAT hman tur hrang hrangte chu computer hmangin Assembly Segment hnuaia Polling Station-ahte semrual a nih hnuah hman mai theih tura buatsaih fel tawh niin, Strong room-ah dahfel vek tawh an ni. Heng bakah hian chhan engemaw avanga EVM/VVPAT thlak ngai a awm thulha hman mai theih tur EVM/VVPAT thlaveng belhchhahna (additional reserve) Ballot Unit (BU) 17, Control Unit (CU) 30 leh Voter Verifiable Paper Audit Trail (VVPAT) 17 te chu vawiin khan khawl hmanga semrual (randomise) niin, hman mai theih tura tihfel (commission) nghal a ni.

He hun hmanpuitu District Election Officer Pu James Lalrinchhana chuan election kaihhnawih hmalakna hrang hrangah Political party-te'n tha taka an tawiawm thin chu lawmawm a tih thu sawiin, Observer aiawh Senior Micro-Observer hriatpuina hnuaia EVM/VVPAT thlavengte randomization leh commissioning neih a nih thu a sawi a. Inthlanna langtlang leh felfai a awm theih nana tawiawm zel turin political party aiawhte a sawm nghal bawk.

EVM/VVPAT first randomization hi chawhma dar 10:30 khan NIC Conference Hall, Champhaiah neih niin, EVM/VVPAT thlavengte chu an awmna tur Assembly Segment; 23-Champhai North AS, 24-Champhai South AS leh 25-East Tuipui AS ahte computer hmanga semrual niin, second randomization hi chawhma dar 11:30 khan RO Office, Aizawl atanga neih a ni a. Hemi hnu hian EVM/VVPAT khawlte hi ECIL Engineer-te nen vote thlak nana hman mai theih tura buatsaih a ni.

Assembly Segment tina EVM/VVPAT additional reserve za zela 5 (5%) thlanchhuahte chu mock poll hmanga enfiah zel a ni a. EVM/VVPAT khawlte hi commission zawh hnu hian venhimna khauh tak hnuaiah assembly segment tin tana ruat strong room-ah dah luh zel niin, vote thlak huna a tul thulha hman turin vote thlak hma ni ah chauh lakchhuah a ni tawh dawn a ni.

A hmaa EVM/VVPAT thlaveng (reserve) commision tih tawh BU 36, CU 37 leh VVPAT 40 nen tihian Champhai District-a Lok Sabha Inthlanpuia hman turin EVM/VVPAT total reserve BU 53, CU 67 leh VVPAT 57 te kawl mek a ni a. Assembly segment ang chuan 23- Champhai North AS ah BU 20, CU 26 leh VVPAT 21, 24-Champhai South AS ah BU 13, CU 16 leh VVPAT 14, 25- East Tuipui AS ah BU 20, CU 25 leh VVPAT 22 te a awm a ni.

Lok Sabha inthlanpui 2024 a Champhai District-a Assembly Segment 3 a Polling Station 84 (23- Champhai North AS ah 30, 24-Champhai South AS ah 25 leh 25- East Tuipui AS ah 29) a hman tura thliar fel tawh BU 84, CU 84 leh VVPAT 84 theuhte chu inthlan huna hman mai theih turin buatsaih fel a lo ni tawh a; assembly segment tin tana a hranpaa siam strong room-ah theuh dahluh fel vek an ni.