4159/2023-2024
Champhai, the 14th March, 2024: Sawrkar laipui Ministry of Tourism hnuaia Swadesh Darshan 2.0 Scheme kaltlanga Champhai District-a tourism chawilar dan tur chungchanga pawimawhte vawiin chawhma dar 10:00 khan District Bawrhsap Pu James Lalrinchhana kaihhruaiin DC Conference Hall-ah sawiho a ni.
District Bawrhsap Pu James Lalrinchhana chuan Swadesh Darshan 2.0 Mizorama kalpui nana District 2 thlan chhuah zinga Champhai District a tel chu lawmawm a tih thu a sawi a. Champhai District chu sik leh sa nuam, hmunhma mawi tak tak leh pipu sulhnu tam zawk awmna a nih avangin khualzin tam zawk hip tura tulte tihchangtlun a pawimawh thu a sawi a. Tourism a theihna kan neihte hi kan tuipuia kan ngaihven tlan a ngai a, thil tha leh hlu zawk siam tura mithiamte ruahmanna kan hlut thiama kan lo inherrem thiam a ngai a ni, a ti a. Khuarel mawina tichhe lo zawng, nakin zel atana nghawng thalo thlen lo tur leh mawhphurhna hlen chhuak zawnga tourism kalpui a tul thu a sawi bawk.
He hunah hian Swadesh Darshan 2.0 scheme kalpui tura zirchianna neitu company EGIS India Consulting Engineers Pvt. Ltd. aiawhin Pu Lalrinchhana Hnamte, Coordinator leh Pu V. Lalrotluanga, Coordinator te'n EGIS zirchianna neih dan leh proposal siamte an sawifiah a. EGIS buatsaih Master Plan Iteration 1 Under Swadesh Darshan 2.0 Champhai Destination hnuaia project siamte leh hmalakna tur duante zirchian a ni a. Thuneitu sang zawkte nena sawiho leh tur a nih avangin an ni nena meeting hunah Master Plan Iteration 1 a lang lo ngaihpawimawh dang rawt belh ngai ni a hriat he huna tarlante chu iteration 2 a telh turin thuneitute hnena thlen ni se tih a ni a.
He hunah hian Tourism Awareness Program, Skill Training leh Skill Testing and Certification kalpui tura pawimawhte sawiho a ni bawk.
Attachment
- Loading attachment...
