4158/2023-2024

Dated Aizawl, the 5th Vau thla 2024: Vawiin khan I&PR Auditorium-ah Department of Information & Public Relations leh Mizoram Film Forum-te tang kawpin a an buatsaih Short Film Making Competition Result Puanna chu I&PR Director Pu C.Lalnunkima kaihhruaina hnuaiah neih a ni a. He hun hi Pi Teresy Vanlalhruaii, Secretary, I&PR chuan khuallian niin a hmanpui.

Khuallian, Pi Teresy Vanlalhruaii chuan Mizo film production chungchang sawiin hmanlai leh tunlai khaikhinin, hmasawnna a nasa hle a a hriat thu a tar lang a. Tunlai Mizo Film chhuak tam tak phei chu khawvel hmun zau zawk ami te lakah pawh zawhpuiawmloh tak a nih tawh thu a sawi. Tin, sawrkar pawhin Department kal tlanga inelna chi hrang hrang a buatsaih thin bakah Mizote zingah Film Industry a Mizoram pawn thlenga kan intarchhuah tawh thu te sawiin, hei hian Mizote chu khawvel tukverh zau zawkah min dah tir mai bakah, min pho chhuaktu a nih theih thu a sawi. Hei bakah hian kan hnam nunphung (culture) thlenga a tihmasawn a a hriat thu a sawi rualin, theihtawpa department pawhin Film lama tuite chu chhawmdawl zel a tum thu a sawi.

Pu Lalawmpuia Khiangte (Chairman, Mizoram Film Forum) chuan inelna a lemchante an endik dan phung (Technical report) tawi kimchang tak a pek zawh hnuin, result puanna neih chhunzawm nghal a ni.

Short Film Making Competition buatsaihah hian lawmman dawngtute chu:
Pakhatna: "Romawii" (Orientation Media te siam)
Pahnihna: "Sal Nula" (FJS Pictures Production te siam)
Pathumna: "Lawmpa" (Mart VIsual Inc. te siam)
Pakhatna hian cheng Nuai 2 a dawng a. Pahnihna hian cheng Nuai 1.5 dawngin Pathumna hian cheng Nuai 1 a dawng a ni. Hei bakah hian an vaiin citation an dawng vek bawk a ni.
Consolation Prize hi Raldawna leh Tumchhingi, AZ Entertainment siam te, Slice of Insurgency, Image Station siam te leh Liankhama Hun Laia Thil Thlengte, AZV Production siamte chu hlan an ni bawk.

Heng bakah hian,  a hnuaia tar lante hi huang hrang hranga lawmman dawngtute an ni.
Best Director : T.C. Vanlalzauva (Romawii)
Best Actor : Jason Lalrinngheta Khiangte (Slice of Insurgency)
Best Actress : Melody Lalrindiki (Romawii)
Best Screenplay : Zova Hnamte (Romawii)

Heng lemchante hi minute 20 atanga 30 inkar niin, Mizo tawng hmanga chan chhuah, English subtitle nei ngei tura tih an nih bakah teh fung hrang hrang: Tawng kauchheh (Dialogue), Costume & Props, Film Direction, Acting Skills, Story Setting leh Originality bakah  Cinematography leh Editing te hmanga uluk taka endik an ni.

He hun hi Pi K. Vanlalsangi, Joint Director, I&PR, (State Nodal Officer on Visual Art) chuan lawmthu sawina neiin a khar a ni.