3033/2023-2024

Champhai the 13^th December, 2023 – Sawrkar Laipui Ministry of Tourism hnuaia Swadesh Darshan 2.0 Scheme kaltlanga Champhai District-a tourism kawnga hmalak dan tur sawihovin vawiin khan Champhai DC Conference Hall, Keifangtlang-ah Champhai DC Pu James Lalrinchhana kaihhruaiin meeting neih a ni.

Swadesh Darshan 2.0 Scheme enkawltu company EGIS atangin Marketing Expert Manish Uniyal leh Urban Designer Simranpreet te chuan Champhai rawn tlawhin tourism hmunhma te an tlawh kual hnuah vawiin meeting ah hian hmalak tul hrang hrangte sawiho a ni.

Swadesh Darshan 2.0 Scheme kaltlang hian Mizoramah Aizawl leh Champhai te tourism kawnga hmalakna atan thlanchhuah niin, he project kalpui chhung hian Champhai District-ah cheng nuai 9000 kaltlanga hmalak tum a ni a. Tun dinhmunah Tlangsam, Zotlang, Keilungliah, Vangchhia, Farkawn leh Dungtlang ah te hmalak tum a ni.

Champhai DC Pu James Lalrinchhana chuan Champhai District chu pipute sulhnu hmun pawimawh tak tak leh khualzin te hip thei tur hmun pawimawh leh mawi tam tak awmna a nin thu sawiin, heng thatna leh theihna awmte hai chhuak tur leh hmang tangkai turin Swadesh Darshan 2.0 Scheme chu tha taka kalpui ngei anih a beisei thu sawiin, kalkhawmte chu theihtawp chhuah tlang turin a sawm a ni.

Vawiin meeting-ah hian Pi C. Lalremruati, DIPRO chuan Champhai District-a Swadesh Darshan 2.0 hmalakna kal mekte leh hmachhawpte report a pe a. Meeting-ah hian Champhai District tana Swadesh Darshan 2.0 kalpui zel dan tur te, hmalak hmasak tul te, ruhrel ruahman tul te, training ruahman ngai te, Swadesh Darshan 2.0 promote zel dan tur hrang hrang te sawiho a ni.