Vawiin khan Champhai DC Conference Hall, Keifangtlangah Teachers' Day hman dan tur ngaihtuahin District Level Teachers’ Day Celebration Committee an thukhawm a. He hun hi Pu Abraham Beirazi Khithie, SDO (Sadar) chuan a kaihruai a ni.

He hunah hian Pu C.Lalbiakzauva, District Education Officer, Member Secretary chuan State Level Working Committee on Teachers’ Day Celebration thurel tlangpui leh dudante tarlangin agenda sawihawnna a nei a. Meeting chuan District Level Teachers’ Day Celebration Committee member-te  chu School hrang hrangah hun hmanpui turin a ti a, kal dan turte pawh a siam fel nghal a ni.

Teachers' Day lawm dan tur ngaihtuaha thukhawm chuan kumin Teachers' Day chu 'State Level Working Committee for Celebration of Teachers' Day 2018' kaihhruaina siam zulzuiin District khawpui, Sub-division-te leh Block hrang hrang bakah khaw hrang hrangah khawtlang hruaitu leh NGO-te nena thawkhoa hman nise a ti a. Teachers’ Day pual banner-te hmun ualau laiahte tarchhuah nise, School tinte pawhin anmahni pualin School leh a chhehvelah  Teachers’ Day lam hawi banner-te tarlang se tiin a rel a ni.

Lawmna programme tinah zirtirtute pawimawhna leh hlutnate uar taka inhrilh thar nise tiin thutkhawm chuan a rel a. Zirtitute Ni puala thuchah chhiarchhuah tur awm angte leh Dr.S.Radhakrishnan chanchin chhiarchhuahnate neih nise, District Bawrhsap thuchah pawh Cable TV lamahte pekchhuah nise tih a ni.

National Foundation for Teachers’ Welfare (NFTW) Fund atan District chhunga Sorkar leh private school-a zitirtute’n Rs.50/- theuh thawh tawhin, zirlai naupangte pawh an tlin tawk ang zela tihluihna awmloa thawh ve tura ngen ni se Committe chuan a ti a. Tanpuina pawisa tlingkhawm atang hian Zirtirtu damlote tuamhlawm thin a ni a, State pawna refer-te chu Rs 10000/- leh State chhunga enkawlte chu Rs 7000/- a tanpui thin anih thu Meeting chuan a tarlang bawk.