Vawiin khan India ram hmun dangte rualin Mizoram-ah National Deworming(NDD) Day chu "Naupang Rulhut pailote hi Naupang hrisel an ni" tih thupuia inzirtirna nen hman a ni a. He programme pawimawh tak hawnna hi vawiin chawhma khan Health Minister Pu Lal Thanzara hoin St Paul's HSS Auditorium-ah a neih a ni a. Rampum huapa Rulhut Thenfaina Ni hian District hrang hrangah Health Department hnathawk te chuan Naupang kum 1 leh Tleirawl kum 19 inkar te hnenah a ruala eiturin Rulhut Hlo an sem a ni.
Vawiina NDD hawngtu, Health Minister Pu Lal Thanzara hrisel pawimawhna sawiin kawngdangahte thang nasa viau pawh ni ila hriselna kan neih si loh chuan thilawm ze nei a ni chuang lo a ni a ti a. Tuna naupang leh thalaite an hrisel chuan Mizoram hmalam hun pawh a hrisel tihna a ni thei ang. Hriselna kawngah taksa invawnfai, ei leh in uluk leh insawizawi te a pawimawh a tih hre reng turin sikul naupangte chu a chah a. Taksa atana hrisellohna tam tak thlen thei leh naupang thanglai te than ti thu thei hial tu Rulhut chu ngaihthah chi a ni lo a sawi a. Rulhut chu inkai awlsam tak a nih avangin a thahna hlo ei a nih dawn pawhin chhungkuaah te pawh a ruala ei deuh kher hi Damdawi lam thiammite duhdan a ni a ti. Health Minister chuan tihdam aiin inven a pawimawh tih sawiin rulhut hlo chu rulhut pai te tana ei ngei chi a nih rualin pai lo tura in uluk a pawimawh bawk a ni tih a sawi a. Hriselna atan taksa in uluk bakah nun in uluk te leh ruihlo chi tinreng lakah fihlim chu tuna naupang duhawm tak tak leh ram nghahfak zirlaiten chonaah ngai se a tha hle ang a ti.
NDD hawnna programme hi Dr.Lalrozama, Director, National Health Mission, Mizoram in a kaihruaia. Vawina NDD puala naupang tena an ei, damdawi hi Albendazole a ni. NDD hi sawrkarin a ngaih pawimawh avangin kum khatah vawi hnih - February 10 leh August 10-ah te hman thin a ni a; hemi ni bika naupang sikul kal theilote ei ve theih turin February thla leh August thlaah te hian ni khat ve ve Hawl kim vek Ni(Mop Up Day) buatsaih leh a ni thin bawk a ni. District hrang hrang atanga report thehluh in a tarlan dan chuan Rulhut Thenfai Ni hnuhnung ber kumin February ni 10 leh a chhunzawmna Mop Up Day a Naupang zinga Albendazole ei zat chu 93% a ni.
