No.981/2020-2020

Vawiin chawhma khan Champhai DC Conference Hall-ah Champhai district chhunga thil man sang zel tur leh ramri kaltlanga ruihhlo tawlhruk tumte ven anih theih dan tur Bawrhsap Pu Mark Lalthanliana hova rel a ni.

Pu Mark Lalthanliana chuan hun engemaw chen inkharkhip kalpui anih avanga nitina mamawh chakkhai leh bungraw to zelin, mipuite chunga phurrit a thlen lohna tur leh ramri kaltlanga ruihhlo tawlhruk ven anih theihna tura nasa zawka tanlak a tul thu a sawi a. Ramrite venhimna nasa tak hnuaia khar ani chung pawha ramri kana ruihhlo tawlh man leh zauh tur a awm thin chu a ngaihmawhawm hle thu sawiin, thil man sang leh ruihhlo tawlhruk tumte engtinnge chak lehzuala kan ven ang tih ngaihtuah tura meeting koh ani, a ti a. Thil man bituk aia sang daiha hralh chuan mipuite, abik takin nitin eichawp dapte tan harsatna lian tak a thlen thin a, thil man sang leh ruihhlo tawlhruk a thlen zel lohna turin tanlak tum a ni, a ti bawk.

Meeting chuan thil man sang zel tur ven kawnga hmalakna hmasa atan remchang hmasa berah Legal Metrology thawktute, Police leh VLTF te tangkawpin Champhai khawpui chhunga thil zawrhna hmunte sawi lawk awm lova tlawh thuta enfiah nise a ti a. Buk tling leh tlinglote dapchhuaka, thil zawrh lakna Voucher leh phurhchhuahna, tha hman dante leh hralhna mante a chinchhuaka zawhfiah hnuah thil hmuh dan kimchang District Administration lama thehluh nise, a tul anga hmalaka bawhzui nise ti a rel a ni a. Thukhawm chuan mipui mamawh tlanglawn ani tela to zel turte uluk taka vilpuia ven nise tiin, Essential leh Non- essential commodities-te chu nakin zel thlenga enzui nise a ti a. Dan loa ramri kana ruihhlo tawlhruk tumte khauh lehzuala ven anih theihna turin ramrite ven uluka, ramri kaltlanga ruihhlo tawlhte veng tur Excise & Narcotics Duty post ngelnghet tak siam nise tih niin, tun aia nasa lehzuala ruihhlo tawlh ruk tum ven nise, damdawi ruih tur zawnga vakchhuakte a tul anga khuahkhirh tura tanlak zel nise tih a ni a. He hunah hian thil man uchuak taka tisanga, MRP aia sang emaw, mahni duhthua aman sang uchuak taka siama hralhte chunga dan anga hremna lekkawh theihna, Legal Metrology Act, 2009, Sec 18 leh Sec 36 te leh Essential Commodities Act, 1955 te zirchian a ni bawk.

Meeting-ah hian Bawrhsap Pu Mark Lalthanliana, Pu Rex Zarzoliana Vanchhawng SP Champhai, Pu Lalnunfela Chawngthu SDO Sadar, Pu B.Zoliana, Assistant Commissioner, Excise & Narcotics, Dr. Lallawmkima DIPRO, Pi Esther Leihang SDC leh Pu Lalnundanga Inspector, Legal Metrology-te an tel a ni.

Attachment

  • Loading attachment...