No.982/2020-2020

Hnahthial District Task Force on Covid 19 chu vawiin khan an Chairman leh District Bawrhsap ni bawk Pu Vanlalmawia kaihhruaiin a chenna bungalow ah an thukhawm a, Mizoram pawn atanga Hnahthial District mi leh sa rawn hawng tur buaipui dan tur chungchang leh inkharkhip kalpui mekah mimal leh pawl thenkhat ten rawtna an thlente sawiho a ni.

Meeting kaihruaitu District Bawrhsap Pu Vanlalmawia chuan “Ni 40 chuang zet inkharkhip kalpui mekah duty hrang hrangte an hahin an inpekna a lawmawm hle a, mipui ten Social distancing an kalpui that theih nan Student Police Cadet te pawh duty thar tir niin an tangkai hle a, NSS pawh a tul hun a che chhuak thei turin an inpeih reng a. Hetianga mahni zawn theuh a kan tang tlang thei hi a thlamuan thlak a, theihtawp i chhuah tlang zel ang u" a ti.

Sawrkar ruahmanna angin India ram hmun hrang hrang atanga rawn hawng tur buaipui mekah Hnahthial District a mi 54 te chu South India atanga rawn hawng tur an awm thu meeting ah hian tarlan niin heng mite hi quarantine na tur hmun leh an mamawh tur hrang hrang te ruahmanna siam a ni.

Tun dinhmuna quarantine mek mi 13 te dinhmun a that thu Nodal Officer Dr.R.Lalsanglura chuan report pein an inenkawl dan hrang hrang a tarlang a. Hnahthial SP Pu Lalbiakkila pawhin Security lamah harsatna a awm loh thu leh zan dar 7:00 atanga zing dar 4:00 chhung curfew pawh mipui ten an zawm that thu sawiin state pawn atanga rawn hawng leh turte rawn thlen hunah duty pahnih dah belh an nih leh tur thu a sawi bawk a ni.

Sorkarin passenger phur lirthei te chu a zatve phurh a phalsak chungchangah DLTF Hnahthial meeting hmasa in Hnahthial District chhunga Auto Rickhsaw service te chu passenger pakhat phur phalsak nise alo tih tawh kalpui mek chu Hnahthial Auto Rickhsaw Owners' Association ngenna angin vawiina meeting chuan pahnih phur phalsak nise an ti bawk a ni.