2592/2024-2025

Champhai, 18th October 2024: Vawiin chawhma dar 11:00 khan Champhai Bawrhsap Pu VL Remliana kaihruaiin DC Conference Hall, Keifangtlangah Bana Kaih Policy hnuaia thlai thar hralh Sensitization-cum-Consultative Meeting neih a ni.

Pu VL Remliana chuan ‘Ban a kaih’ Policy chu September ni 19 khan Chief Ministerin a lo tlangzarh tawh tih tarlangin, policy pawimawh tak sawiho leh zirchhianna hun Champhaiah neih a ni thei ta chu lawmawm tih thu a sawi a. Department hotu kalkhawmte chu an chan theuh a midangte fiahfai taka an zirtir theihna tur leh hemi kaihhnawiha harsatna nei te an puih theihna turin ngun taka he Policy hi zirchiang turin a ngen a; hlawkthlak taka policy kalpui a nih theihna turin ṭan la ṭheuh turin a sawm bawk a ni.

He hunah hian Pu Lalhmingmuana, Managing Director, Mizoram Agriculture Marketing Board chuan Power Point presentation hmangin thlai thar hralh dan tur kaihhruaina a sawi zau a, thlai chingtute aṭanga a leitute a thlen dan tur te, a lak khawmna hmun atanga hralh dan tur te, District Agricultural Marketing Committee (DAMC) mawhphurhna hrang hrang te leh thil tul dang te a sawi a ni.

He hunah hian line department hotute leh MAMB member te an tel tha hle a ni.