2593/2024-2025

Aizawl 18th October, 2024 : Dr. Renu Sharma, IAS, Chief Secretary chuan vawiin khan Plot No. B-41, MYC bul, MINECO-ah Senhri Run, Govt. Residential Quarters Type V leh Type VI sakna tur lungphum a phum. 

Programme tawi MYC Conference Hall a neihah Mizoram CS Dr. Renu Sharma chuan Mizoram Sawrkar hnuaia hna pawimawh tak tak chelh Mizoram-a awm te tana Residential Quarters sakna tur lungphum phum theiha a awm chu lawmawm a tih thu a sawi a. Sawrkar hnuaia officials-te'n an chenna tur quarter tha tak an nei thin hian an hnathawhna kawngah lungmuanna, thathona leh nasa lehzuala inpekna an neih phahna a nih a beisei thu a sawi a ni.

 Sawrkara thawktute chuan an phutawk, an khawsak awlsamna tura an mamawh (Basic Needs) an dawn ngei chu an chanvo a nih angin inthlahrung lo turin a chah a, an hnathawhna-a an insawrbing theihna atana puitu a nih zawk thin thu a sawi. Ram pawna an colleague te lakah pawh insit lo tur leh mahni inrintawkna (Self Esteem) pholangtu he residential quarters sak tur hi ni ngei se a duh thu a sawi bawk a ni. 

Pu K. Lalthawmmawia, Commissioner & Secretary, PWD report tarlana a landanin Type V leh VI Quarters sakna tur sum hi Special Assistance to State Capital Investment (2024-25) Part-1 hnuaiah hmuh niin sum Sanction zat hi ₹ 15.42 Crore a ni a. Type V Quarter (4 units) (1 unit per floor) hi a pumpuia a zau zawng tur hi 1066.85 sqm niin Basement-1, Ground floor, First floor, Second floor leh Third floor zau zawng tur hi 213.37 sq.m vek ni tura ruahman a ni. Type VI Quarter (4 units) (1 unit per floor) hi a pumpuia a zau zawng tur hi 1245.39 sq.m tur niin Ground Floor, First Floor, Second Floor leh Third Floor te zau zawng hi 250.00 sq.m tur a ni.

Hei bakah hian a foundation, a bang, kawngkhar, tukverh leh ventilation leh chhuat leh thil dang hrang hranga hmanraw hman tur hrang hrangte chipchiar takin a tarlang nghal bawk a ni. 

Vawiin Lungphum phumna programme hi Pu Vanlaldina Fanai, Commissioner & Secretary, General Administration Department chuan a kaihruai a. Mizoram Secretariat a Officials thahnem tak he hunah hian an tel a ni.