1283/2024-2025

Champhai, 24th July, 2024: State Election Commission thuchhuah angin Champhai District huam chhunga khaw panga Khuangthing, Leisenzo, New Champhai, Ngur leh Thekpui ah VC By-Election neih tur a ni a. Hemi atana inpuahchahna kal zelah vawiin chawhma dar 11:00 khan Pu K Zorammuana Addl DC chuan  VC By-Election Draft Electoral Roll, 2024 chu DC Conference Hall-ah  tlangzarhin, pollitical party aiawhte hnenah bu khat theuh a hlan nghal a ni.

Pu K Zorammmuana chuan VC te chu ram inrelbawlna kawng mai bakah sawrkar tan kutke pawimawh tak an nih thu a sawi a.  VC By-Election neih tur bultanna hmasa draft roll tlangzarhna hun tha tak neih a ni thei chu lawmawm a tih thu sawiin, thawhhona duhawm tak hnuaiah hun bi thliah ang zela felfai taka kalpui a beisei thu a sawi a. Inthlanna dik leh muanawm nei turin electoral roll felfai leh thianghlim neih a pawimawh thu pawh sawiin, kalkhawmte chu vote nei theite zawn chhuah leh vote an thlak ngei theih nana theihtawp chhuahpui turin ngen a, Electoral Roll-a chuang tur dik takte an tel a, tel lo turte thenfai a nih theih nana thuneitute tawiawm tlat turin a chah bawk a ni. 

He hunah hian Election Officer Pu Benjamin Zalawma Ralte  hnen atangin State Election Commission thuchhuah bawhzuia VC By-election neih tura ruahmanna neihte ngaihthlak niin  Ngur leh Thekpui ah hian VC te Dissolved anih avang leh Khuangthing, Leisenzo leh New Champhai ah VC member thenkhat te thawh chhunzawm theih loh avanga By-Election neih anih tur thu a sawi a ni. 

Vawiina Khuangthing, Leisenzo, New Champhai, Ngur leh Thekpui VC By-Election Draft Electoral Roll tlangzarhin a tarlan dan chuan tun dinhmunah Khuangthing ah hian in 299 awmin vote nei mi 1083 an awm a, heng zinga 546 hi mipa niin, a dang 537 te chu hmeichhia an ni. General seat 4 leh Reserved seat 1 an nei a. Govt Middle School Khuangthing chu Polling Station atan ruat a ni.

 Leisenzo ah hian in 202 awmin Vote nei mi 597 an awm a, heng zinga 309 hi mipa niin  a dang 288  hi hmeichhia an ni.  General Seat 4 leh Reserved 1 an nei a. Govt Primary School Leisenzo chu Polling Station atan ruat a ni.

New Champhaiah hian in 323 awmin Vote nei mi 968 an awm a, heng zinga 452 hi mipa niin  a dang 512  hi hmeichhia an ni. General Seat 4 leh Reserved 1 an nei a. Govt Primary School New Champhai chu Polling Station atan ruata a ni.

Ngur ah hian in 321 awmin Vote nei mi 1035 an awm a heng zinga 498 hi mipa niin  a dang 537  hi hmeichhia an ni. General Seat 4 leh Reserved 1 an nei a. Govt Middle School Ngur chu Polling Station atan ruat a ni. 

Thekpui ah hian in 76 awmin Vote nei mi 227 an awm a, heng zinga 125 hi mipa niin  a dang 102  hi hmeichhia an ni. General Seat 2 leh Reserved 1 an nei a. Govt Primary School Thekpui chu Polling Station atan ruat a ni.

Ruahman danin vawiin July ni 24, 2024 hian draft roll tlangzarh a ni a. Naktuk July ni 25, 2024 atanga July ni 31, 2024 thlengin thu thlen duh neite tan claims & objections period hawn a ni a, hemi hun chhung hian roll-a inziaklut tura dilna leh thu thlen duh neite tan hun hawn a ni leh ang a. August ni 8, 2024 thleng hian dilna lut leh siamthat tulte hearing kaltlanga chinfel vek hman tum a ni a.  VC By-Election neih huna hman tur VC Electoral Roll thar ber chu August ni 13, 2024 hian tlangzarh tum a ni.

He hunah hian ERO/AERO, DIPRO, VLO, VC, Political party aiawhte, NGO hotute leh Chanchinbumite an tel a. Draft Electoral Roll tlangzarh hnu hian Election Branch-ah Village Level Officer (VLO) te tan training neih chhunzawm a ni.