1282/2024-2025

Dated Aizawl, the 24th July, 2024: Vawiin khan Mizoram State Board for Wildlife (SBWL) chu an chairman Pu Lalduhoma, Chief Minister hovin CM Conference Hall-ah an thukhawm a. Agenda pawimawh tak tak an rel. Hei hi Mizoram State Board for Wildlife thutkhawm vawi 10-na a ni.

Chief Minister chuan, tun hnaia Delhi ka zinnaah Mizoram CAMPA Chairman ka nih thu Union Minister of Environment & Forest in min lo hrilh a. Kei lah chuan ka nih thu ka lo inhre reng reng si lova, a mak ka ti hle a ni. Union Minister hian Mizorama Forest Clearance fel lo vanga hmasawnna hnathawh chawlh lailawk (pending lists) min lo pe a. Political level-ah min tanpuia, heng kan harsatna te min chinfel sak hi a duh ngawih ngawih a ni. Kan ram tana hmasawnna tur, ram mipuiten tangkai taka kan hman tur hmalakna vek an ni a, a hlawhtlin theih nan kan tangrual tur a ni. Dan hi mipuite hmasawnna leh hamthatna atana siam a ni a, an harsatna leh an hmasawnna tur daltuah kan lo hmang tur a ni lo, tiin member te a chah a ni.

Vawiin meeting hian Standing Committee of State Board of Wildlife din chungchang te, Aizawl Zoological Park luh man tihsan ve tawh thu te, wildlife victims te ex-gratia tihsan chungchang te, kum 2021 a Saiin a tihhlum Pi Hnianghniangi compensation dilna te, Zorinpui - Longmasu inkara kawngpui thar (NH 502A) laih tura ruahman leh Sairang -Tuipuibari inkar kawngpuia leihlawn dawhthat ngai pahnihte recommendation chungchang te, Phawngpui National Park leh Ngengpui Wildlife Sanctuary enkawl zel dan tur chungchang te an sawi a. Hun pawimawh laia Wildlife Zero Tolerance Drive neih te, Air Gun leh a kaihhnawih khuahkhirhna nasa zawk thu te, ramsa chhanchhuah te fel fai zawka enkawl dan tur te, Mizorama nungchate hming mumal leh felfai taka thliartu tur Nomenclature Committee lo din tawh, vawiin thleng hma la la lo tuai tharleh thute bakah, hmun pawimawh bika ramsaten kawngpui an kanna tur (corridors/passages) siam thute an sawi bawk.

Meeting ah hian Vice Chairman Pu Lalthansanga, Minister, EF&CC, Pu Vanlalhlana, Minister, PWD, Pu TBC Lalvenchhunga, Adviser to CM, Lt. Col. Pu Clement Lalhmingthanga, MLA bakah Board members te an kal tha hle a ni.