612/2022-2023
Champhai, the 24th May, 2022: Vawiin khan LAD leh PHE Department tangkawpte chuan Champhai District chhunga VC te tan training hrang hrang an buatsaih.

Training hi Pi Esther Leihang, DLAO Champhai chuan kaihruaiin VC kalkhawmte chu thawhhona tha leh zual nei tura tan la turin a sawm a. An thil zirturte chu thiam lo nih hreh lo tur leh an hriatthiam lohte training lai ngeia zawt fiah turin a chah bawk. DLAO chuan Sawrkar Department hrang hrangte nen inpawh taka hmasawnna hna thawk tura thawhhopuiah a sawm bawk a ni.

Vawiin training-ah hian Champhai District chhunga VC hrang hrang aiawh pakhat theuh kohkhawm niin tuihna humhalh leh faina chungchang Er. Vanlalmuanawma SDO, Champhai Project Sub-Division, PHE Department hnen atangin ngaihthlak a ni a, Pu C. Vanlalhruaia, UDC hnen atangin Account book vawn dan leh GPDP buatsaih dan ngaihthlak niin, Pi H. Lalenkawli, DPM, DLAO Office hnen atangin Public Financial Management System (PFMS), Geo Tagging leh E-Gram Swaraj Portal chungchang ngaihthlak a ni bawk.

Training hi naktukah Khawzawl District chhunga VC te tan buatsaih chhunzawm leh a ni ang.