611/2022-2023
Aizawl, the 24th May 2022 : Vawiin khan Rural Development Minister Pu Lalruatkima hovin a Pisa ah District Rural Development Agency te (DRDA), District Rural Development Office (DRDO) a leh chungchanga Cabinet Memorandum buatsaih chhin chu Principal Secretary, Finance Pu Vanlalchhunga; Secretary, Rural Development Pu R. Zarzosanga leh a thawpui dangte; Director, Rural Development Department Pu R. Lalthazuala leh DP &AR. Deputy Secretary Pu H. Lalrinpuia ten an thlirho.

Minister Pu Lalruatkima chuan Sawrkar Laipuiin hun rei tak atanga an kalpui tawh, DRDA Scheme chu ram pumah tihtawp anih avangin DRDO neih a tulzia te a sawi a. DRDO dinna tur phalna GAD in an pe tawh tih sawiin DRDA in hna an thawhte chhunzawm zel anih thei nan District ah te RD Office chu a awm a ngai, DRDA hi tawp mahse hengte hi DRDO ah letin la kalpui zel chu tha nia Department in a hriat avangin he ruahmanna hi siam anih thu a sawi a. Panchayati Raj zawm state ah te chuan Zilla Parishad te hian DRDA hna hi la tura beisei an ni a, mahse Hmarchhak state tam zawkin Panchayati Raj kan zawm lova, Zilla Parishad ang te hi kan nei lova, chuvangin DRDA aiah DRDO hi kan mamawh takzet a ni tiin District a RD Scheme hrang hrang kaikhawmtu an awm loh chuan hmasawnna hna hrang hrang thawh a harsa thei nia a hriat thu te a sawi.

Meeting ah hian Cabinet Memorandum buatsaih chhin chu zau taka sawiho a ni a, chung zingah chuan he ruahmanna atana post siamrem ngai zat te, Sawrkar sumbawm a nghawng dan tur te, District a RD Office pawimawhna leh an mawhphurhna te chu zau taka sawiho a ni.

Sawrkar Laipui chuan tunhnai khan Centrally Sponsored Scheme – District Rural Development Agency Administration Scheme chu April ni 1, 2022 atangin tihtawp a nih tur thu an rawn hriattir a, Zilla Parishad awmna state ah te chuan DRDA hi he body a chhunfin a rawt a, Zilla Parishad awm lohna state ah te chuan State Sawrkrin a duh angin ruahmanna siam mai se tiin an rawt a ni.