196/2026-2027

Champhai, dated 17th April, 2026 : Vawiin khan District Local Administration Officer (DLAO) Pu James Lalnithanga chuan Rashtriya Gram Swaraj Abhiyan (RGSA) hnuaiah Champhai District chhunga Village Council (VC) pariat hnenah Computer set a hlan a, The Mizoram (Village Councils) Act, 2025 a buin a semchhuak nghal bawk a ni.

He hunah hian Pu James Lalnithanga chuan thu sawiin tunlai khawvelah thiamna a san tawh avangin khawpui chauh ni lo, khaw te zawk thleng pawha 'e-governance' hman a pawimawh tawh zia a sawi a. RGSA scheme hnuaia computer sem te hian khawtlang inrelbawlna leh VC te hmasawnna hnathawh hrang hrang record vawnna kawngah nasa takin VC-te a puih a beisei thu a sawi a. Computer-te hi sawrkarin VC-te tana a pek a nih avangin uluk taka enkawl tur leh, rorelna a lo inthlak pawha in hlan chhawn leh tlaka enkawla hmang turin VC-te a chah a.
Pu James Lalnithanga chuan VC inkaihhruaina The Mizoram(Village Councils) Act, 2025 chu Mizo tawng ngeia ziah a ni a, felfai zawka an khawtlang inrelbawlnaa an kalpui theih theina turin uluk taka zirchiang turin a chah bawk a ni.

Vawiina Village Councils computer dawngtu te hi Champhai Bethel Veng, Champhai Venglai, Tuipui, Champhai Vengsang, Selam, N. Diltlang, Lungphunlian, leh Vaikhawtlang te an ni a,  he hmalakna hian khawtlang rorelnaa tihchangtlun bakah sorkar hmalakna hrang hrangte tluang zawk leh felfai zawka kalpui a nih theihna tur atana ruahhman a ni. RGSA hnuaiah hian VC Council sawmthum te hnenah Computer set hi hlan a lo ni tawh bawk a ni.