593/2024-2025

Champhai, the 29th May, 2024: Lok Sabha Inthlanpui, 2024 a vote tlate chhiar tura Champhai District-a inpuahchahna kalpui mek zelah vawiin chawhnu dar 2:00 khan District Election Office, Champhai buatsaihin DC Conference Hall-ah vote chhiar ni Counting Day-a duty tur Counting Day Staff-te training pek an ni.

He hun hmanpuitu District Election Officer Pu James Lalrinchhana, Assistant Returning Officer (ARO) ni bawk chuan vote thlak a pawimawh ang chiahin vote chhiar a pawimawh thu sawiin, mahni mawhphurhna theuhte tha taka kan hlenchhuah phawt chuan MP Election hlawhtling takin kan khar thei dawn a ni, a ti a. Vote chhiar huna duty tur Staff-te chu chetsualna a thlen loh nana training tha taka ngaithla tur leh a taka chhawr tangkai tum turin a fuih a. Counting Day hlawhtlinna chu Counting Official leh Staff-te kutah thui tak a innghah tlat avangin uluk taka hmalak tlan a tul thu a sawi a. Ruihhlo laka fihlim tur leh nunphung mawi lo leh mit tikham thei laka inthiar fihlim tum theuh turin a fuih bawk.

Thusawitu dang Addl. DC Pu K. Zorammuana, Addl. ARO, 23-Champhai North Assembly Segment chuan boruak muanawm tak leh thawhhona tha tak hnuaiah Lok Sabha Inthlanpui  vote thlak zawhfel a nih ang bawkin boruak muanawm leh felfai tak hnuaiah vote chhiar a nih leh ngei a beisei thu a sawi a. Counting Day-a duty turte chu mawhphurhna an neihte tha tak an hlenchhuah theih nan taksa leh rilru hriselna ngaipawimawh theuh turin a chah bawk.

Vawiin Counting Day Staff-te tana training buatsaih hi Pu Benjamin Zalawma Ralte, Election Officer chuan kaihruaiin Pu Lalrinawma, PD, DRDO & Addl. ARO, 25-East Tuipui Assembly Segment-in Counting Day Staff hrang hrang Data entry buaipuitu, Counting Hall duty, Videographer, Strong Room duty, EVM khaitu, EVM seal buaipuitu leh Reception-a thu turte tihtur leh mawhphurhnate a sawifiah a ni.

Training zawhfel hnu hian Champhai District chhunga Assembly Segment 3 atana Counting Hall theuhah vote chhiar ni a chetlak dan tur an zir a, ataka entirna an nei nghal a ni.

June ni 4, 2024 hian Lok Sabha Inthlanpui, 2024 a vote tlate chhiar a ni dawn a. Champhai District chhunga Assembly Segment (AS) 3, 23-Champhai North, 24-Champhai South leh 25-East Tuipui a vote tlate chu Counting Hall  hran theuhah chhiar tur niin, Counting Hall tinah hian Counting Table 8 bakah VVPAT Counting Booth (VCB) 1 zel ruahman a ni a; avaiin Counting Table 24 leh VVPAT Counting Booth 3 ruahman niin vote tlate hi round 4 a chhiar zawhfel tum a ni.