592/2024-2025

2024 Ṭomir thla ni 29: Lok Sabha Inthlanpui, 2024 buatsaiha Lawngtlai District chhunga assembly bial pathuma vote tlate chhiar tura ruat, counting supervisor leh counting assistant-te leh vote chhiar vil tura ruat, micro observer-te tan vawiin khan Government Lawngtlai College-ah training thawh khatna buatsaih a ni.
Chawhma lamah counting supervisor leh counting assistant-te tan training buatsaih niin, chawhnu lamah micro observer-te tan training buatsaih a ni thung a. Training petu, Lawngtlai BDO Pu Collin Hlychho chuan inthlan vote chhiar dan kalphung leh vote chhiarnaa hriat tur pawimawh hrang hrang a zirtir a. EVM-a vote tla chhiar dan leh form dah khah dan a taka enchhin niin, zawhna leh chhanna hun hman a ni bawk.

Lawngtlai District-a Lok Sabha Inthlanpui 2024-a vote tlate chhiar tur hian counting supervisor 48 leh counting assistant 54 ruat niin, vote chhiar vil tur micro observer 60 ruat an ni bawk a. June ni 1, 2024 (Inrinni) khian Government Lawngtlai College-ah vote chhiar training thawh hnihna buatsaih leh tura ruahman a ni.

Ruahman lawk dan chuan, Lok Sabha Inthlanpui 2024-a Lawngtlai District chhunga assembly bial pathuma vote tlate hi June ni 4, 2024 (Thawhlehni) zing dar 8:00 aṭangin Government Lawngtlai College-a counting hall pathumah chhiar a ni dawn a. Bial tin tan counting hall hran ṭheuh ruahman niin, 36-Tuichawng leh 37-Lawngtlai West counting hall-ah vote chhiarna dawhkan 14 ve ve leh 38-Lawngtlai East counting hall-ah vote chhiarna dawhkan 11 hun a ni dawn a. Polling station hrang hranga vote tlate chu polling station number indawt dan zelin a tahtawla chhiar tura ruahman a ni.

Attachment

  • Loading attachment...