591/2024-2025

Khawzawl, 29th May 2024: Vawiin chawhma dar 11:00 khan Khawzawl District AIDS Control and Prevention Committee chu an Chairman Khawzawl Bawrhsap Pu K. Lalrohlua hovin Khawzawl DC Meeting Hall-ah an thu khawm a. HIV/ AIDS darh zel tur venna kawnga hmalak dan tur hrang hrang an sawi ho a ni.

Thutkhawm kaihruaitu Pu K. Lalrohlua chuan HIV/ AIDS chu lang lo lama ram leh hnam min ei chhe theitu a nih angin fimkhur a pawimawh hle a ni, a ti a. Bawrhsap hian HIV/ AIDS a darh zel lohna turin inzirtirna tha a pawimawh thu pawh a sawi a, sakhaw rawngbawltute chu uar zawka zirtirna kalpui turin a ngen a. Hei bakah hian District Narco Coordination Center (NCORD)-in ruihhlo chungchang inzirtirna (awareness) an neihnaah HIV/AIDS chungchang zirtirna kalpui thei se thaa a hriat thu leh Social Media kaltlanga campaign neih tam a pawimawh a tih thu a sawi bawk a ni.

He hunah hian Pi Zuiliani Hrahsel, Jt. Director (IEC), MSACS-in powerpoint presentation hmangin HID do kawnga hmalak ngaihna leh hmalak dan turte a sawifiah a. Mizoram State Aids Control Society (MSACS), tarlan danin Khawzawl District-ah HIV vei mi 616 an awm tih a sawi a, mipui za zel in-test ta se 2.13 % chu HIV kai tura ngaih an ni, a ti. HIV chu hnam timang thei natna a nih angin siam that lam hawi a ngai a, in ven leh in enkawl ngaihpawimawh a tul a ni, a ti bawk.

Vawiin thutkhawmah hian HIV/ AIDS chungchang inzirtirna ngawrh zawka neih dan tur te, District Community Resource Group (DCRG) din dan tur te, Naupang leh tleirawl te hnena ziritirna pek dan tur chungchangte sawi ho a ni a. Sawrkar Department aiawhte, khawtlang, tlawmngai pawl leh Kohhran hruaitute an tel a, HIV/ AIDS kaihhnawih thupui hrang hrangah inkawm hona leh sawi hona hun hlawkthlak tak hman a ni.