4194/2023-2024

Champhai, the 15th March, 2024: Vawiin khan khawvel hmun dang rualin Champhaiah World Consumer Rights Day puala hun hman a ni.

I&PR Auditorium, CHANEM building Champhaia hun hman kaihruaitu DCSO Champhai Pu C.C. Sakhawliana, Registrar, District Consumer Disputes Redressal Commission chuan a kaihruai a, Consumer right day-in a tum ber chu consumer-te'n an dikna chanvo an chan ngei theihna tura inzirtir a nih thu a sawi a. Thil lei leh man chawia hmangtute chu consumer-te an nih thu a sawiin, "Mi tinin kan dikna chanvo kan hriat chian em em a ngai a ni" a ti a. Thil lei leh man chawia hman kawnga lungawi lohna neite chu Consumer Court pan nachang hre turin a chah bawk.

Vawiina Champhaia World Consumer Rights Day hmannaah hian Resource Person Pu Lalthamawia Bolchhim, Asst. Prof., Govt. Champhai College-in kumin World Consumer Rights Day thupui 'Fair & responsible AI for consumers' tih thupui hmangin kalkhawmte zirtirna a pe a. Pu Lalthathafamkima, District Consumer Disputes Redressal Commission member-in kalkhawmte Consumers Disputes Redressal Commission chungchang a zirtir  bawk.