4193/2023-2024

LUNGLEI; the 15^thMarch, 2024: Vawiin chawhnu dar 2:00 khan Convention Hall, Convention Centre-ah Pu K.Sapdanga, Hon’ble Minister for UD&PA, Home.etc. chuan Lunglei Municipal Council (LMC) ten nikum a an buatsaih Mizoram Cleanliness Competition, 2023 a lawmman dawngte hnena lawmman hlanna programme “Award Ceremony Of Mizoram Cleanliness Competition, 2023” –ah khuallian niin hun a hmanpui a, Pu Lalzuithanga, Chairman, LMC chu he programme-ah hian khualzahawm a ni bawk.

Vawiin  programme-ah hian thu sawiin, Pu K.Sapdanga chuan LMC-ah Lunglei Mipui ten ZPM party hi full mark min pe a,chu meisi chu Zoramah meipuiah a lo chang ta a, chuvang chuan Mizoramah Kalphung thar- Mipui sawrkar a lo piang ta a ni. LMC councillor te hi Lunglei khawpui enkawl tura mipui ten kan thlan tlin te anni a, eng emaw avangin, kum khat dawn engmah hmanrua nei lo leh hnathawk thei lovin an lo awm tawh a, kan councillor te hi hna thawh chakin, za zek zekin an lo awm tawh a ni. Mahse tunah chuan hnathawhna tur hmanrua kan lo pek tawh dawn avangin mipui ten eng ang councillor nge kan neih tih kan hre tan tawh dawn a ni. Budget Session hmasa berah LMC enkawlna tur budget thahnem tak pek an ni.

Lunglei khawpui hi in vannei hle a, Lunglei District pumpui enkawltu tur High Powered Committee (HPC) in nei a, Lunglei khawpui bik enkawltu tur Lunglei Municipal Council (LMC) in nei bawk a, tin LMC chu Ward 11-ah then a ni a, han inthik tur leh han inthlim tur awm reng reng lovin  Lunglei mipui ten councilllor in han thlang chhuak leh nghal a. Zep nak emaw AMC-ah chuan party an in awm pawlh a, hnathawh a rualkhai thei lova, chu chuan harsatna tam tak a siam a ni.  LMC-ah chuan chutiang chu a thleng ve dawn lo a ni, a ti. Mi thenkhat chuan hetiang ang sawrkar hi khalh ngiltu an awm loh chuan an kal sual thei a ni, an ti a, mahse kan councillor te hi khalh ngilh pawh an ngaih ka ring lo, State atanga Fund an dawn hma pawha anmahni thawhkhawm atanga mipui tan hna lo thawk duh mai mi an ni; tih ka hria, a ti.

Faina chungchang sawiin, Pu Sapdanga chuan  Faina hi rilru atanga a lo pian loh chuan a fai ngawt theih loh,mihring rilru in bawlhhlawh a ngaihmawh lo chuan khawlai a bawlhhlawh mai a, a ngaihmawh chuan kan khawlai atangin a lang mai a ni, a ti. Sawrkar â tak a piang a, a intiam zul mai a, kan eiru lovang, dik lo takin thil kan ti lovang, tlak huamin hna kan thawk ang, sum hmangin vote kan zawng lovang etc.  te kan ti a,kan intiam zul mai a ni.Lunglei mipui mai nilo, zoram mipuiin kan intiamna te kha lo chhinchhiah se, kan thutiamha kan din lova, mipui tehnaah kan tlin lo chuan term leh ah chuan min chawlh tir mai rawh se, tih hi kan dinna a ni. Chuvangin Mipui te i tangrual ang u, kan duhkhawp loh sawrkar thlan nawn leh hi mipui ten kan ba loh, Chuvangin term leh ah chuan “Kalphung thar- Mipui Sawrkar” tiin ZPM hi a inzuar tawh dawn lo, “kan hnathawh atang hian min teh ru”, tiin kan inzuar tawh dawn a ni, a ti.

Vawiin Ward Ceremony programme hi K.Lalrinawma, Vice Chairman, LMC in a kaihruai a, Pi F.Lalhmangaihkimi, IS, UD&PA in report Faina kawnga UD&PA hmalakna hrang hrang leh hmachhawp te, Lunglei khawpuiin Fai inelna-a lawmman a lo lak tawh dan te leh Mizoram Cleanliness Competition,2023 an thlanchhuah dan te a tarlang a.

Mizoram Cleanliness Competition (MCC), 2023 a Lunglei Municipal Area chhunga Local Council Fai ber 3 thlan chhuah te chu:

1^st    Salem Local Council-------------Trophy +₹1, 00,000/-

2ⁿ     Zohnuaia Local Council---------Trophy+ ₹80,000/-

3^rd    College Veng Local Council----Trophy + ₹60,000/- te an ni a.

Local Council 3:

        I.            Farm Veng local council

       II.            Serkawn LC

      III.            Venglai LC te hnenah Consolation prize atan Citation leh ₹20,000/- theuh pek an ni bawk.

Vawiin Programme-ah hian Pu Donny Lalruatsanga, CEO, LMC kaihhruaina hnuaiah LMC Website www.lmclunglei.com chu khuallian Pu Sapdanga’n a tlagzarh bawk a ni.

Khualzahawm Pu Lalzuithanga, Chairman LMC leh Pu C. Sawihlira, DUDO te pawhin thu sawina hun a hmang bawk a ni.

Pu Zorinsanga Hmar, Executive Councillor, LMC chuan lawmthu sawina-in vawiin Award Ceremony programme chu a khar ta a ni.

Vawiinah vek khan Convention Hall-a programme hman hma hian Pu Sapdanga hian Pukpui khaw daia Solid Waste Management  Centre (SWMC) dinna  tur hmun a tlawh a. He SWMC bunna tur hmun hi Pu Lalruatfela  S/o Pu Lalzuithanga, Chairman LMC in ram a donate  a ni. Hon’ble Minister Pu Sapdanga hian Lunglei High Powered Committee (HPC) Office pawh tlawhin, HPC Vice Chairman Pu V. Malsawmtluanga leh a staff ten an lo dawng sawng a, Sub-Hqrs YMA hruaitu ten Lunglei Traffic police Branch Puitling din tul zia leh Raltlante awmdan tur mumal zawka ruahmanna siam tul zia te an lo thlen a ni. Convention Hall-a hun a hman zawh hian Minister hian DC office leh DUDO office te a tlawh leh nghal a ni.

Minister hi  Pu V.Malsawmtluanga, Vice chairman, HPC leh Lunglei North Bialtu MLA, Pu T.Lalhlimpuia, Lunglei  West bialtu MLA, Pu Lalramliana Papuia, Lunglei South Bialtu MLA, Pu Lalzuithanga, Chairman LMC leh LMC Councillor te, Lalmalsawma Pachuau, Secretary, UD& PA, Pu Andrew H.Vanlaldika, Director, UD&PA leh Lunglei district a Sawrkar officials lian DIG(SR), DC,SP leh Head of Office te, MJA Lunglei te bakah ZPM party hruaituten an tawiawm a ni.