4192/2023-2024

Aizawl the 15th March, 2024 : Vawiin khan Samagra Shiksha leh Central YMA ten School Education Complex Conference hall, Mac Donald Hill-ah thawhhona thuthlung an ziak a, School Education Minister Dr. Vanlalthlana’n he thuthlung ziah hi a hmanpui.

Minister Dr Vanlalthlana chuan he hunah hian thusawiin Mizoram zirna tihhmasawnna tur kawng hrang hrangin thawh a ni dawn a, sikula zirlaite chhiar atan comics siam tum a ni a, comics-ah hian Mizo tlawmngaihna leh Mizo thil pawimawh chi hrang hrang bilh luh a ni dawn a, zirlai naupangten Mizo thil an hriat phah theih dawn a, hetiang hi kum kalta lamah a bial chhungah hlawhtling takin a lo kalpui tawh tih a sawi. Minister chuan MLA ten an bial chhung tihhmasawn nan kum nga chhungin nuai sangkhat an nei thei tawh dawn a, thil tangkai tak tak thawh nan a hman theih dawn tih sawiin zirna atana hman theih dan kawng dap a pawimawh tih a sawi. School-a thawk zirtirtute attendance lak nan KAI tih App chu siam a ni a, he hmanrua atang hian zirtirtu kal that leh that loh chu awlsam takin en zung zung theih a ni dawn a ni a ti.

Thu a sawi zelnaah Minister chuan zirna hi ram leh hnam humhalh nan a pawimawh a, Mizoram hi thlah kal zelte tan chenna tlaka chhawpchhuah tum a, penho zel ang u a ti. YMA te nen pawh thawhhona ṭha tak an neih theih zel a beisei thu a sawi bawk.

Pu Lalhmachhuana, President, Central YMA pawhin he thawhhona thuthlung ziahnaah hian thusawiin YMA-in quality education a buaipui mek a, zirlaiten zirna tha hi an phu a, tun dinhmunah chuan zirnaah khawpui leh thingtlang a la inthlau viau a, hei hi ngaihtuah a ngai hle a ni a ti. Sumdawnna atana zirna kalpui an tam ta chu an ngaimawh thu leh khawng zawka kal an duh thu te leh zirlai naupangte lehkha chhiar tur lakkhawm dan turah ngaihtuahna an sen mek thu a sawi bawk.

Samagra Shiksha leh Central YMA thawhhona thuthlungah hian Samagra Shiksha State Project Director Pu Lalhmachhuana leh Central YMA President Pu Lalhmachhuana ten hming an ziak a, YMA General Secretary Prof Malsawmliana leh Samagra Shiksha Additional State Project Director Pu H.Lalhruaitluanga ten hriatpuina an ziak bawk.

Thawhhona thuthlungah hian naupang sikul kal lo dapchhuah te, naupang rualbanlo zirna kawnga thawhhona tur te, Central YMA Group leh Branch hrang hrangah sikul kaichhan (Vidyanjali) kawnga hmalak te, zirlaiten ngaihsan leh hnualsuat tur an hriat theihna tura  rilru dik an put theih nana thawhho te a tel a ni.

Thawhhona thuthlung ziahnaah hian Minister bakah School Education Department Commissioner & Secretary Pi Lalzarmawii, Director Pu Lalsangliana, MBSE chairman Pu JH Zoremthanga, SCERT Director Pi Zohmingliani leh School Education officer te, State Project Office Samagra Shiksha Officer te  an tel a ni.