4191/2023-2024

Aizawl the 15th March, 2024 : Vawiin khan School Education Complex, Mc Donald Hill-ah School Education Minister Dr. Vanlalthlana'n Mizoram Samagra Shiksha hnuaia zirnaa hnathawh leh hmalak dan vilna leh thlithlaina 'Vidya Samiksha Kendra' (VSK) a hawng.

Minister Dr. Vanlalthlana chuan state danga a lo hmuh tawh a rualawh ruk em em zirna kawnga hnathawh leh hmalak dan vilna leh thlithlaina 'Vidya Samiksha Kendra' hawn a lo ni thei ta chu lawmawm a tih thu a sawi a. Hmun khat atanga School-a zirlai leh zirtirtute dinhmun thar lam ber ber te, zirtirtu awm ṭhat leh chhiatna te, naupang tlem leh tamna te, sorkarin sikula hna a thawk chi hrang hrang te awlsam taka hmuh zung zung theihna tur a awm ta hi a lawmawm a, zirna hnathawh chi hrang hrang vil leh thlithlai theihna, hmuh reng theiha a awm tur hi a lawmawm hle a ni a ti. Hetiang hmanraw ṭha hi Mizoram zirna atan kailawn thar a nih thu leh ṭangkai taka hman a nih a beisei thu a sawi.

VSK hi zirna kawnga hnathawh leh hmalakna chi hrang hrangte hmun khat aṭanga vilna leh thlirna a ni a, zirtirna hmanrua chi hrang hrang sikulin a neih library te, ramp te, toilet te, tui thianghlim in turte leh zirna lama data chi hrang hrang en theihna tur a ni. Hemi atan hian khawl pawimawh chi hrang hrang hman a ni a, VSK atan Ministry of Education atangin vbch 3 hmuh a ni.

Mizoram VSK hi zirna kawnga hmalakna chi hrang hrang - School Management system te, intervention hrang hrang thlir zuina atan te, zirlaite dinhmun tehna atan te, zirna dinhmun bihchianna atan te, sikul leh zirlai dinhmun tarlan nan te, School grading system te leh  Financial management system atan te hman tum a ni.

Vawiina VSK hawnnaah hian Minister bakah School Education Department Commissioner & Secretary Pi Lalzarmawii, Director Pu Lalsangliana, MBSE chairman Pu JH Zoremthanga, SCERT Director Pi Zohmingliani leh School Education officer te, State Project Office Samagra Shiksha Officer te  an tel a ni.