4190/2023-2024
Dated Siaha 15th March, 2024: Vawiin chawhma dar 11 khan Siaha District Consumers' Union buatsaihin 'World Consumer Rights Day' hmanna DIC Training Hall- Siahaah neih a ni a, Pu Abraham Beirazi Khitie, Addl.DC chuan khuallian niin a hmanpui.
Pu Abraham Beirazi Khitie chuan kalkhawmte chibai bukna nei hmasain, Siaha District Consumers' Union hruaitute hmalakna fakawm a tih thu a sawi a. Consumer - te dikna chanvo humhalh kawnga an hmalakna chu chhuanawm tiin, Siaha mipuite tana an thahnem ngaihna chu a lawmawm hle a ni, a ti. Kum 1962, March ni 15 khan U.S. President John F Kennedy chuan United States Congress- ah Consumer te dikna chanvo humhalh a tul zia a lo tlangau pui tawh a, a hmalakna chu khawvelin ngaipawimawhin kum tin March ni 15 - ah 'World Consumer Rights Day' hi hman a lo ni ta a ni, a ti.
Pu Abraham Beirazi Khitie chuan 'Consumer' tih hian a leitu, ei leh in tu emaw, a dawrtu leh zuartu, kan zavai hian a huam vek a ni, a ti a. Mihring kan lo piana, nausen kan nih atangin nu hnutetui kan in nghal a, chuta tang chuan Consumer kan nihna chu a lo intan daih tawh a ti a. Kan lo thang lian zel a, ei leh in bakah, thuamhnaw leh thildang tam tak kan mamawh a, he khawvel kan chhuahsan thleng hian consumer chu kan lo nita a ni, a ti. Rights- tih hi kan dikna chanvo sawina mai a ni a, he kan dikna chanvo himhalh tlat hi kan mawhphurhna a ni a, dikna chanvo humhalh tlat turin mawhphurhna mitinin kan nei a ni, a ti.
Siaha District- a consumer te dikna chanvo humhalh turin Consumer Commission, Consumer Council leh Consumer Union - te an awm reng a, mipuite tana awm leh ding reng an nihna hre reng tur leh chhawr tangkai turin mipuite a sawm a ni.
Khuallian chuan tun lai khawvelah online hmanga thil chah kan tam em em a, hemi kawngah pawh hian consumer- te kan fimkhur tlan a tul hle a ti a. A bik takin Service provider te zingah inthlahdah deuh an awm thin a, hei hi a veiawm hle tiin, Siaha district- a service provider te chu tan la thar leh turin a chah a. Sumdawng zingah MRP aia to a hralh an la awm fo thin chu pawi a tih thu tarlangin Pu Abraham Beirazi Khitie chuan MRP aia sanga hralh thin sumdawngte chu an chunga dan anga hmalak a nih theih nan Consumer Union kaltang tal a complaint thehlut thin turin a ngen a ni. Complaint thehluh kan ngam chiah lo a nih pawhin leilo ngam mai ang u tiin kalkhawmte chu a fuih a. Khawvel thiamna sang zelah Consumer - te tana tangkaitur thil tamtak a awm tawh tih tarlangin hmang tangkai turin theihtawp chhuah a tul tak zet a ti a.
Siaha district- a 'Consumer' te dikna chanvo humhalh tlat turin Consumer hruaitute kutah engkim dah vek theih a ni lo tiin Pu Abraham Beirazi Khitie chuan Siaha district mipui zawng zawngte tang tlang leh thawkho turin a sawm nghal a ni.
Pu Vanlaltlanchhunga, Member, District Consumer Commission chuan
'Consumer Protection Act 2019' in Consumer - te dikna chanvo a humhalh dan leh thubuai hlabuai a rem dan bakah lungawilohna thlen tur a tih ngai hrang hrangte inzirtirna a nei a. Pu R. Lalnghakliana, Asst. Controller, Legal Metrology, Siaha District, chuan " Bukna leh tehna dik se, a hmangtu pawh dik rawh se" tih thupui hmang in Power Point Presentation pekna a nei bawk.
Vawiin 'World Consumer Rights Day' hmannaah hian Professor. Chawngkhuma Chawngthu, President, Consumers' Union Siaha chuan hun kaihruaiin, Pu Thasai Azyu, Secretary, CUSD chuan report pekna a nei a. Consumer Club, Government Saiha College leh NGO aiawhte an tel thei a. Kumin 'World Consumer Rights Day' thupui atan hian " Fair and Responsible AI For Consumers " tih thlan a ni.
