4189/2023-2024

Khawzawl, 15th March 2024: Lok Sabha Inthlanpui 2024 neih tura inpuahchahna kal zelah vawiin khan Khawzawl District-a Department hotu - Head of Office te pualin Model Code of Conduct (MCC), Postal Ballot, Inthlan puala buatsaih IT Application leh venhimna chungchang te zir hona hun neih a ni.

Khawzawl DC Meeting Hall-a neih Training hi Bawrhsap Pu K. Lalrohlua chuan a kaihruai a. MLA Inthlanpui 2023 hlawhtling taka buatsaih a nih theih nan District Office hotute thlawpa tha tak an dawn avangin lawmthu a sawi. Inthlan puan a nih chuan Model Code of Conduct (MCC) pawh hman tan a nih nghal tur thu tarlangin Pu K. Lalrohlua chuan Department hotute chu MCC inkaihhruaina te zawm a, an department kaihhnawih thil zawng zawng ah khawng taka MCC hi kengkawh theuh turin a ngen a. Social Media a chak tawh avangin official te an fimkhur a tul thu leh a tha zawnga hman thiam a pawimawh thu a sawi bawk a ni.

He hunah hian Pu Timothy R. Lalhmangaiha, Election Officer chuan Election Commission of India buatsaih IT Application - inthlan kaihhnawiha dan bawhchhiatna thlenna tur ‘cVIGIL’ leh inthlan vuakvet laia pawisa fai leh ruihhlo man te ziah luhna tur ‘Election Seizure Management System (ESMS)’ chungchang a sawifiah a. Inthlan puan a nih hnu chuan mi tu pawhin phalna la hmasa lova cheng 50,000 aia tam pawisa fai a ken chuan man sak theih a nih thu tarlan a ni.

Pu Lalchhuanthanga, SP Khawzawl chuan venhimna kalpui dan tur a sawifiah a. Pi V. Lalmuanpuii, Project Director, Khawzawl DRDO, State Level Master Trainer ni bawk chuan Postal Ballot sawifiahna hun a hmang a; District Level Master Trainer Pu Elijah LH Sanga, SDC chuan Model Code of Conduct chungchang sawifiahna hun a hmang bawk a ni.