4188/2023-2024

Dated Champhai, the 15th March, 2024: Vawiin khan Champhai District in kum 25 a tlin lawmna Champhai DC Office Complex, Keifang tlangah buatsaih a ni a. Chief Minister Pu Lalduhoma chuan khuallian niin a hmanpui.

Khuallian hian Jubilee lungphun leh Jubilee puala Photo Galery a hawng, chumi zawhah a lawmna programme ah Souvenir tlangzarh lehin thusawina a nei a ni. Chief Minister hian, Tualpui khuaa piang, Champhaia inbengbel ta kan ni a. Champhai hi ka nu leh pa leh ka u te lungnghahna, kan damchhunga kan theihnghilh theih tawh loh tur a ni, vawiinah pawh hian Champhai bialtu MLA pakhat angah ka inngai a ni. Kum 1970 chho khan GM High School ah lehkha zir chungin Mizo Union Champhai Block Thalai President ka ni a. 1972 UT inthlan hmasa berah khan Champhai bialah ding ngei turah min ngai vek. Mahse khatihlai khan kum 21 chauh ka la nih avangin ka ding thei ta lova, Champhai bialtu MLA hmasa ber ka ni teuh hle. Kha inthlanah khan Mizo Union chuan sawrkarna kan siam a, Pu Ch. Chhunga a han CM veleh khan a PA ni turin min ko thla ta a ni. Champhai hi politics a ka zinkawng bul ka tanna a ni.

Champhai district hi pi leh pute sulhnu hmun pawimawh tam tak neitu, khualzin hipna hmunhma ngah tak a ni a. Heng kan Tourism hmunhma te hi nasa takin kan thuam tha dawn a. Mipuite pawh khualzinte laka in hawihhawm thiam a tha hle a ni. Buh leh thlai dang tharchhuak tam district, Grape wine siamna hmun pahnih awmna, Sangha thar tam district a ni a. Hmalak theihna ram pawh kan la nei tha hle. Tin he district hian ram hruaitu pawimawh tak tak a lo hringchhuak tawh thin. Tun sawrkara MLA engemawzat te pawh hi Champhai District-a piang leh seilian kan ni. Myanmar-a kan unauten harsatna an tawk a, himna zawngin an rawn tla thla a. Chung kan unaute lo dawngsawng hmasatu, vawiin thlenga engemawzatte enkawl mektu in ni a. Kan unaute chhawmdawl kawnga khawtlang leh kohhran te hmalakna tha tak avangin lawmthu ka sawi a ni. Tunhma chuan heng lai bial khawtinte hi Zonun ze mawi tak takte a taka nunpui thintu tia sawi a ni thin a. Vawiinah enge kan an zel ka hre tawh lova, khang zonun ze mawi tak tak te kha a theih chen chen vawng nung zel ila. Pipu hmun hlui leh nun hlui tha tak takte neitu nih zel i tum tlat ang u, tiin mipuite a sawm a ni.

Champhaiin district a neih hnua hmasawnna kan hmuhte a tam tawh hle a, hmasawnna dangte pawh a lokal zel dawn a, kan sawrkar pawh hian hmachhawp kan ngah hle a ni, tiin Champhai district hmasawn zelna tura hmachhawp thenkhatte a tarlang a. Ramin inrelbawlna tha, dan leh hrai kenkawhna fel fai leh huapzo rorelna leh hmasawnna a awm theih nan district ah thendarh kan ni a. District kan nih chhan hrerengin khawtlang hruaitute leh official te pawhin hma kan la thin dawn nia. Mipuite pawh hian mawhphurhna pawimawh tak kan nei theuh tih inhria ila, khua leh tui tha nihna hi mahni chanvo hriatnaah a innghat ber lova, mahni mawhphurhna hlen lamah a innghat tam hle a ni, a ti.

Silver Jubilee lawmna inkhawm hi Pu James Lalrinchhana, Deputy Commissioner in a kaihruai a, Rev. K. Lianmunga'n hunserh hmangin Pu H. Lallianvela'n Champhai district nei tura hma an lo lak tawh dan te sawina a nei a. Champhai district a MLA ni mekte pawhin thusawina an nei bawk. Heng bakah hian thusawi leh item pawimawh dang engemawzat a awm a, tlai lamah Jubilee ruai hlim takin an theh a ni.

Chief Minister hi a nupui Pi Liansailovi leh Champhai district biala MLA Pu TBC Lalvenchhunga, Adviser to CM, Pu H. Ginzalala Adviser to CM, Pu Ramthanmawia leh Lt. Col. Clement Lalhmingthanga ten an tawiawm a. Champhai DC lo ni tawh te, Head of Offices te, khawtlang hruaitute te, Media mite leh sawm bik mi pawimawh engemawzat an tel a ni.

Champhai District hi December ni 12, 1997 ah puan a ni a, sawrkar hriattirna hi a kumleh March ni 11, 1998 ah chhuakin, hemi kum vek April thlaah ropui taka hawn a ni.