No.4273/2021-2022
Aizawl the 15th March, 2022: Vawiin chawhma dar 10 khan Champhai District Bawrhsap Pu Henry C.Lalrawnkima hovin World Consumer Rights Day 2022 pualin DC Conference Hall-ah 'Fair Digital Finance' tih thupui hmangin hun hman a ni.

Pu Henry C.Lalrawnkima chuan District mipuite World Consumer Rights Day puala chibai bukin, Sawrkar leh District Consumer Association tangkawp buatsaiha Consumer Rights Day puala inzirtirna huaihawt chu consumer-te dikna vawnhim kawnga rahbi pawimawh tak a nih ngei a beisei thu a sawi a. Mi zawng zawngte chu thil lei leh dawrtu kan nih avangin consumer-in min huam vek a ni, a ti a. Thil leiah lungawilohnate a awm changin a thlenna hmun tur dik taka thlen lova kan phun lungawi leh mai thin chu pawi a tih thu sawiin, kan sum neih angte hman kawngah fimkhur leh fir taka kal a tul thu a sawi a. Kan dikna palzut a niha lungawilohnate kan nei a nih chuan dikna din chan theih nan hmaizah nei lovin dan hnuaiah huai takin hma kan la thin tur a ni, a ti bawk.

Thil leitu leh dawrtute dikna vawnhim chu khawvel pumah ngaih pawimawh a nih thu sawiin, digital khawvela cheng kan nih avangin online kaltlanga insumdawntawnna hman kawngah kan fimkhur zual deuh deuh a tul a ni, a ti a. Consumer ten lungawilohna an thlenna tur Champhai District-ah Consumer Dispute Redressal Commission din a nih tawh thu leh, DC Office-ah Court bunfel tura hmalak chhoh mek a nih thu a sawi bakah, Champhai District President atana ruat Additional District & Sessions Judge awmna tur room pawh puahchah mek a nih thu a sawi bawk a. Consumer-te dikna leh chanvo vawnhim kawngah tumah ralbang thei bik an awm loh thu sawiin, mipuite chu an dikna leh chanvo te vawnhim a nih theih nan dan anga hmalak hrehlo tur leh puih an tulnaah thuneitute rawn hrehlo turin a chah a ni.

World Consumer Rights Day puala hun hmanah hian resource person pahnih ten Consumer Rights chungchang zirtirna an pe a. Pu C. Lalengliana, Addl. SP Champhaiin 'Crime Related to Digital Finance' tih thupui hmangin zirtirna a pe a, Pu Revise L. Pachuau, Manager, SBI Champhaiin 'Fair Digital Finance' tih thupui hmangin zirtirna a pe bawk a, heng zirtirnate hi media kaltlangin mipuite hnenah zau zawka puanzar a nih theih nan thehdarh a ni a. Consumer Protection Act chungchang inziahna lehkhabu sem chhuah a ni bawk. District Bawrhsap hian Champhai District Consumer Association hnenah an hmalak zelna tur kawnga puih nan Rs. 5,000/- a hlan a ni.

He hunah hian Pu CC Sakhawliana, DCSO Champhai leh Pu C.Zaihmingthanga, Secretary, Champhai District Consumer Association ten Consumer Rights chungchang an sawi bawk.

He hunah hian DC Office a Officer leh Staff-te, DIPRO leh Champhai District Consumer Association hotute an tel a ni.