No.4272/2021-2022
Aizawl 15th March, 2022 : Vawiin khan I&PR Conference Hall, Mamit ah Mamit District Consumer's Organisation buatsaih in World Consumer Rights Day- 2022 hman a ni a. Pu Lalnunhlua MCS, District Bawrhsap Mamit chuan khuallian niin he hun hi a hmanpui.

Khuallian chuan khawvel pum huapa hman thin World Consumer Rights Day chu consumer te infuih thar nan leh kan dikna chanvo te kan hriat thar leh theihnana hman thin a nih thusawiin, kumina kan thupui, "Fair Digital Finance" hian a tum ber chu tunlai khawvel changkanna in a ken tel, online payment hmanga inbumna tihbo leh hemi kawnga fimkhur tura midangte pawh hrilhhriat a nih thu a sawi. Mi tupawh consumer dinhmuna ding thei vek kan nih avangin lei leh hralh chungchanga kan dikna chanvo hriat chu kan mawhphurhna a ni tiin dan hnuaiah consumer te hi venhim tlat kan nih thu a sawi bawk.

Kumin 2022 World Consumer Rights Day thupui ah hian "Fair Digital Finance" tih chu hman a ni.

He hun hi Pu FL Rinngheta President MDCO chuan kaihruaiin Pu Lalruatzauva, Advocate District Court Mamit chuan lei leh hralh chungchanga consumer-te dikna chanvo hrang hrang sawizauna a nei a. Kalkhawmte atangin zawhna leh chhanna bakah sawihona neih nghal a ni.

He hunah hian Mamit khawpui chhunga MUP, MHIP hruaitute, Retailer, thutharthehdarhtute bakah mi sawmbikte an tel a ni.