No.4271/2021-2022
Aizawl, the 15th March 2022: Vawiin chawhma khan Durbar Hall, Raj Bhavan-ah Sawrkar hnathawk tha te chawimawina sang - Governor’s Gold leh Silver Medal te chu sem a ni a. Governor Hari Babu Kambhampati hnen atangin hnathawk tha thlanchhuah mi 11 te chuan chawimawina tangkapui leh chawimawina thuziak an dawng a. He hunah hian Home Minister Pu Lalchamliana leh Dr K.Beichhua,Minister of State for Excise & Narcotics te pawh an tel a ni.

Governor Hari Babu Kambhampati chuan chawimawi tlak te chawimawi hi khua leh tuitha te tihtur leh kan in tihphur tawnna atana pawimawh tak a ni a ti a. Mizoram sawrkar hnathawk zingah an hnaa mi inpe leh an hnathawh that avanga chawimawi phu te chu Governor’s Medal kumtin pek chhun zawm zel an nih tur thu a sawi a. Kuminah Police leh Excise & Narcotics Department a hnathawk tha tak tak zingah mi 11 thlanchhuah an nih thu leh sawrkar department danga hnathawk tha te pawhin he chawimawina hi an dawng thei tih a sawi a ni.

Sawrkar hna chu mipui vantlang rawngbawlna a ni a, hei vang hian sawrkar hna hian mi tam tak nitin nunah kawngro a su a; sawrkar hnathawk, mahni hnaa inpe te chuan mipui tan awlsamna kawng tam takah a siamsak thin a ni a ti. Mipui rawngbawlsak hna chu hna ropui tak a ni tih sawrkar hnathawk te chuan an hriat reng a ngai a; nitin a mamawhtute tan tanpuitu nih tum thin tur leh hlim hmel pu chungin taimakna leh inpekna thuk tak nen hna an thawk thin tur a ni a ti.

Home Minister Pu Lalchamliana chuan sawrkar hnathawkte chawimawina hun kumin Republic Day khan Hrileng vangin a neih theih ta lo tih a sawi a. He hun pawimawh tak Raj Bhavan-ah Governor in a buatsaih chu lawmawm a tih thu a sawi a ni. Home Minister chuan Mizoram Police hnathawk zingah chawimawina sang tak dawng thei an awm leh ta chu lawmawm a tih thu sawiin he lawmman dawngtute hian midangte tan chona leh phurna a siamsak ngei dawn a ni a ti. He hnathawk tha chawimawina hi Police leh E&ND te tan chauh a nih loh thu te, sawrkar department hrang hranga hnathawk tha te pawhin an dawn theih thu a sawi a. Head of Administration leh HOD te pawh hetiang lama beng hawng tur leh an naute zinga hna thawk tha chawimawi phu te chu an hnathawh dan leh an hlawhtlinna kimchanga ziahsak a, chawimawina dawng thei tur list thehluhnaah thehluhsak turin a chah a ni.

Dr K Beichhua, Minister of State for Excise & Narcotics Department (E&ND) chuan kumin Governor’s Gold leh Silver Medal dawng thei zingah a nau te pawh a vawikhatna atana an lang thei chu a chhuang hle tih a sawi a. E&ND a thawk te chu mi tlemte ni mahse ruihhlo tawlh leh hralh thilah Mizoram venghim turin hna hautak zet thawktu an ni a ti. He chawimawina hlu tak E&ND thawktu tlem te pawh a tihphur sawt a, a hma aia nasa zawka tan la tura a nawr a rin thu a sawi bawk a ni.

Kumina Governor’s Gold Medals dawngtute chu Pu C.Lalbiaktluanga, Sub-Inspector, ANS, E&ND, Pu Lalkunga, H/C 170, ANS, E&ND, Pu PC Lalrinsanga, C/270, Aizawl DEF leh Pu Lalhriatpuia, C/199, Aizawl DEF an ni a. TGovernor’s Silver Medals dawngtute chu Pu R.Lalrinsanga, Sub Inspector, ANS, E&ND, Pu PC Laldingngheta, C/316, ANS, E&ND, Pu F.Tlanghmingthanga, Inspector(AB), 1st IR BN, Pu Rohlupuia, Hav, 2nd BN MAP, Pu Lalringzuala Fanai, C/16320, 3rd BN MAP, Pu PC Siamkima, C/30, Aizawl DEF leh Pu R.Lalrochhara, C/16350, PTS, Thenzawl an ni.

Governor’s Medal semna inkhawm hi Pu H.Lalengmawia, Commissioner & Secretary, Home Department chuan a kaihruai a. Pu JC Ramthanga, Addl Chief Secretary in thuhmahruai a sawi a. Pu Vanlalmawia, Addl Seceraty, Home Department chuan lawmthu sawiin huntawp a khar a ni.