No.4270/2021-2022
Dated Aizawl the 15th March, 2022: Vawiin khan Serchhip DC Conference Hall ah World Consumer Rights Day, 2022 lawmna buatsaih a ni a, Serchhip Bawrhsap Pi Nazuk Kumar, IAS, chu khuallian niin mithiamten Consumer dikna chanvo chungchang an sawite ngaihthlak a ni.

He hun Pu Lalmuansanga Ralte, MCS, Addl DC kaihhruaiah hian Pi Nazuk Kumar chuan, mitinte hi engemaw kawng tala leitu (Consumer) kan nih vek avangin thil leitute dikna chanvo hriatna leh dan kenkawhna tha hi kan mamawh vek a, chutiang inhrilhhriatna hun tha vawiina kan nei thei hi a lawmawm hle a ni, a ti. Kum 1962 vel atangin khawvelin mumal takin consumer te dikna chanvo duan leh kenkawh kawngah hma a la tan a, India pawhin consumerte dikna chanvo humhimna dan tha tak tak leh a kengkawhtute, consumer lungawi lote tlanluhna tur rorelna peng hrang hrangte pawh kan nei a, a tul ang zelin i hmang tangkai thin ang u, a ti. Kumina kan thupui hi “Fair Digital Finance” a ni a, tunlai khawvelah mihringten internet kaltlanga sum leh pai inhlanna kan hman nasat tawh avang leh a hmangtute pawh kan pun chhoh zel avangin; him taka heng sum leh pai inhlannate kan kalpui theih nan kan tihturte, kan invenna turte kan hriat that a tul hle a, a awlsamna avanga tangkai taka kan hman theih lai hian tihsual palh vanga chan thei kan ni ve bawk a ni tih hriaa fimkhur taka kan hman a tul a ni, a ti bawk.

He hunah hian Pi C. Lalzemawii, Asst. Manager, SBI, Serchhip Branch chuan Fair Digital Payment chungchang sawifiahna leh inven tulna te sawina hun a hmang a. Pu C. Lalremthanga, Officer-in-Charge, Serchhip Police Station chuan Ponzi Scheme (Chiahpuam) chungchang sawifiahna leh a invenna te sawiin, Pu H. Zonuntluanga, Chairman Serchhip Consumer Association chuan Consumer te dikna chanvo tih thupui hmangin zirtirna a pe bawk. Tin, he ni pual hian District Consumer Protection Council chuan DIPRO nena tangkawpin Consumer te hriattur pawimawh sawifiahna video tawi an siam bawk a ni.

Vawiin a World Consumer Rights Day hmanna inkhawm hi Pi C. Laltleipuii, MCS, SDO Sadaar in lawmthu sawiin a khar a ni.