603/2023-2024

Champhai, the 26th May, 2023: Thla thar June ni 5 a World Environment Day lo thleng tur puala Environmental Day hman mekah vawiin chawhnu dar 1:30 khan Champhai khawpui chhunga Primary atanga Higher Secondary School Eco Club Member thlan bikte chu Champhai khawpui chhung thianfaiin an hnatlang.

Hnatlang neih hma hian inkhawm tawi Circuit House, Champhai tualah neihi niin, he hun hi Pu R.Lalrinzuala, OA, DEO Office Champhai chuan a kaihruai a, DEO Pu C.Lalbiakzauva leh Pu H.Lalengzama, HEO, DEO Office Champhaite'n faina chungchanga pawimawhte sawiin zirtirna an nei a ni.

He hun hmanpuitu DEO Champhai Pu C.Lalbiakzauva chuan polythene leh plastic hmanin khawvel a tih chhiat mek thu sawiin, hetiang vawikhat hman chauh daih hi hmang tawh lo tur leh hman nawn theih tawihthei hmang uar sauh sauh turin kalkhawmte leh mipuite a chah a. Tawihtheilo polythene leh plastic-te hian kan khawvel boruak leh mihring hriselna a ti chhe chak em em a, loh theihloha kan lo hmang a nih pawhin a nih dan tur dik taka kan sawngbawl a ngai a ni, a ti a. Hmankhat chauh daih kan hmanloh hian kan hriselna atan a tha a, kan hun kal lehzel tur atan khawvel tha zawk kan siam a ni, a ti bawk a. DEO chuan khua a lo faia a lo thianghlim zel zawk theih nan leh tui tlante a lo thianghlim theih nan bawlhhlawh paih danah mitinte fimkhur a ngaih thu sawiin, khawpui fai leh thianghlim siam tura mitinte tanrualpuiah sawmin faina hnatlanga chhuak turte a vailiam a ni.

Champhai khawpui chhung bawlhhlawh chharfai tura an chhuah hma hian Pu R.Lalrinzuala, OA, DEO Office Champhai kaihhruainain polythene leh plastic-te hmang tawhlo turin zirlai kalkhawmte hian intiamna thu an sawi rual bawk a ni.

Vawiin hnatlangah hian School 6 atangin zirlai engemawzat an thawk chhuak thei a; Champhai khawpui chhunga kawngdung leh khawlai hmun langsar laia bawlhhlawh tlate an chhar khawm a. Hemi hnu hian Pu Hrangthantluanga Ralte, OA, DEO Office Champhai kaihhruaiin CHANEM tualah kharna hun neih a ni a; a khar nan faina thutiam sawi.