604/2023-2024

Aizawl, 26^th May 2023: Vawiin khan Sports & Youth Services Minister Pu Robert Romawia Royte hovin a pisa-ah State Level National Service Scheme (NSS) Advisory Meeting vawi 19-na neih a ni a. He hunah hian kum 2022-2023 chhunga NSS hnathawh hrang hrang te thlirletna neih a ni a, kum 2023-2024 atana NSS hmalakna tur hrang hrang te sawiho a ni bawk.

I.          Kum 2022-2023 chhunga NSS hna thawh tlangpui:

State NSS Officer cum Deputy Secretary, NSS Cell chuan kum 2022-23 chhunga NSS hmalakna leh hnathawh hrang hrang te hetiang hian report a pe .

1. A thlawn a thisen pek uar taka kalpui niin, Aizawl leh Aizawl pawna blood bank hrang hrang ah thisen unit 5998 an pe a ni.

2. Thing chi hrang hrang 2657 lai phun thar niin, kum hmasa lama an lo phun tawh 5000 chuang lai an enkawl mek bawk.

3. Mizoram hmun hrang hrangah mipui vantlang hman turin :

     1)    Public Water Point             :           35 nos,

     2)    Public Urinal/Toilet             :           18 nos,

     3)    Waiting Shed                     :           10 nos leh

     4)    Benches                            :           12 nos siam a ni. 

4. Vantlang hmun pawimawh - Damdawi In, School, College, khawlai, bazar, Sorkar hmun pawimawh, Thlanmual leh a dang vawi 591 lai tihfai hnatlang neiin NSS volunteer te hi an thawk chhuak a ni. 

5. School, College leh hmun hrang hrangah Faina chungchang, HIV/AIDS, zu leh ruihhlo, tuihna humhalh, ramngaw humhalh, thisen pek, disaster management leh a dang hmanga inzirtirna (awareness campaign) vawi 888 zet an hmang a ni. 

6. India rama ni, kar leh thla pawimawh hrang hrang te NSS volunteer-te hian hlawhtling takin an lo hmang ve thin a ni. 

II.        Kum 2023-2024 atana NSS hmalakna tur hrang hrang remtihte: 

1. NSS unit hrang hrangte tan Action Plan - thisen an pek zat tur, thing  phun tur zat, awareness programme chi hrang hrang an neih theih zat tur, cleanliness drive neih dan tur leh India sawrkarin ni pawimawh a tih ho observe tur chi hrang hrang te pawh sawiho niin remtih a ni. 

2. State Level NSS Advisory meeting chuan kum 2023-2024 atangin heng Institutions pahnih te chu NSS Unit pek remtih a ni.

1) Zotlang Higher Secondary School, Zotlang, Lunglei.

2) Blue Mountain Higher Secondary School, Sangau. 

3. Kum 2023-2024 NSS Theme atan - Mission Life and Positive Lifestyle for Healthy Society on ‘Drug Abuse, Tobacco and Cancer Control’ tih chu an pawm. 

4. NSS pum huapa Y20 Meet on Mission Life and Positive Lifestyle tih thupui hmanga programme siam an rel.

National Service Scheme hi September ni 24, 1969 khan din a ni a. A din tirhah chuan University leh State thlan bikah te chauh hawn a ni a, zirlai inziaklut pawh 40,000 (singli) chauh an ni. NSS hi Unversity leh State hrang hrangah hawn belh zel niin tun dinhmunah zirlai inziaklut nuai 40 lai an awm tawh a ni.

Mizoramah chuan NSS hi Pachhunga University College-ah kum 1972 khan din a ni a. He mi hnu hian college hrang hrang ah din chhoh zel a ni a. Kum 1996-a Pre-University (PU) te Higher Secondary School-a leh an nih khan NSS hi Higher Secondary School lamah kum 1997 atangin din a lo ni ve ta a. Tun dinhmunah school leh college hrang hrang ah NSS Unit 99 awmin, NSS Volunteer 30,100 an awm mek a ni. NSS hi a din tirh atangin kum 2015-16 financial year tawp thleng khan Centrally Sponsored Scheme a ni a. Kum 2016-17 atangin Centrally Sector Scheme-ah thlak a ni a, Central sawrkarin fund zawng zawng a tum sak tawh a ni.