605/2023-2024

Aizawl The 26th May 2023 : Information & Public Relations Minister  Pu Lalruatkima chuan vawiin khan Woodland Hills Auditorium, Zonuam-ah a bial chhung atanga 2023 HSSLC exam Arts-a Mizoram puma 6-na Ruth Larohlui lawmpuina hun chu khuallian niin a hmanpui a, a lehkhabu ziah ‘Shallow’ chu tlangzarh nghalin lawmpui nan laptop a hlan bawk.

Minister chuan a bial chhung atanga Mizoram puma 6-na ni pha an awm chu ropui in a lawmawm takzet a ti a; HSSLC pass hlimin sap tawnga lehkhabu puitling a ziak thei chu a chhuanawm takzet a ni a ti. Tuna a hlawhtlinna chu duhtawk mai lovin, tumruhna nen hmalam pan zel turin duhsakna a hlan a, nakin lawka a hlado chhamah Zoram mipuiin an la chham pui ngei a rin thu a sawi bawk.

Pu Lalruatkima chuan hlawhtling tura taimakna leh tumruhna a pawimawh thu sawiin thawhrim rah seng tu ni thei turin kalkhawmte a sawm a, hlawhtlinna hmelma lian ber chu chapona a ni tiin inngaitlawm fo turin kalkhawmte a chah a ni. Nu leh pa leh zirtirtute chu zah leh chawimawi phu tak ‘kawng dik min kawhhmuh a, thu tha min hrilh fo tu an ni’ tiin an hlu hle a ti bawk.

Khuallian chuan lehkhabu chhiar tam a pawimawh hle tiin thangthar tên uar zel se a duh thu a sawi a. Lehkha chhiar chu finna bul a nih thu sawiin rilru leh ngaihtuahna tizau tu leh midang kaihruai thei tura remhriatna pe tu a ni tih hre reng turin kalkhawmte a chah a ni.

Vawiin inkhawm hi Pu Biaksailova’n a kaihruai a, Rev. K Lalpiangthara’n hunserh hmangin Mt. Carmel School Principal Pu Lalnunkunga Sailo chuan thusawina a nei bawk. Lehkhabu ziaktu Ruth Larohlui bakah Prof.  Rualkhuma Colney hnen atangin thusawi tawi ngaihthlak a ni a. Dr Lalchhuanmawii’n lawmthu sawiin hun a khar a ni.