National Programme for Prevention and Control of Deafness (NPPCD) kaltlangin District Co-ordination Committee for National Hearing Awareness Campaign (NHAC) chuan vawiin khan Champhai District Hospital-ah ‘World Hearing Day’ pualin programme a buatsaih a. He hunah hian Champhai Bawrhsap Pu Mark Lalthanliana chu khaullian niin, Beng ri hriatna thalo zawnchhuah leh chhawmdawlna tur National Hearing Awareness Programme a hawng a ni.

Khuallian Pu Mark Lalthanliana chuan sawrkarin mipuite an lo hrisela damna tha an neih theihnan theihtawp a chhuah thu sawiin, Champhai district mipuite tana Damdawi In changtlung tak, hmanrua leh thawktu tha tak takte a dah chu vanneihthlak hle a a hriat thu a sawi a. Hmalakna tam tak zingah beng ri hriatna lama harsatna neite tana tanlak a ni chu lawmawm tiin, beng thalote chu inkiltawih mai lova, an theihna leh duhnate tipuitling thei tura tan la sauh sauh turin a fuih a. Champhai district mipuite chu hriselna kawnga hmanraw tha leh thawktu thiamte rawn thin tur leh a tangkai thei ang bera hmang tura duhsakna hlan chungin, Beng ri hriatna thalo zawnchhuah kawnga hmalakna leh chhawmdawlna kalpui tur chu a hawng a ni.

He hunah hian Dr. RE Lalremruata, Medical Officer, NCD chuan World Hearing Day puala thupui thlan, 'Hearing for life, Don't let hearing loss limit you' tih chu sawizauin, Bengngawnna lo awm theih dan leh chi hrang hranga thliar hrante a sawifiah a. WHO in bengngawngna a ngaih pawimawh thu leh titlem tura chak taka hma a lak mek thu a sawi a. Naupiangte chu an ri hriat theihna endik a tul thu sawiin, fimkhur loh vang leh mithiamte rawn lova damdawi ei chuan beng a tih chhiat theih thu a tarlang a. Beng lama harsatna nei te leh inringhlelte chu NPPCD Cell, District Hospital, Champhai pan thin tur leh kawtkai maia a awm pan hreh lo turin a a chah nghal a ni.

Vawiin World Hearing Day puala hun hman hi Dr. Zatluanga, Medical Superintendent, District Hospital Champhai chuan kaihruaiin, mipuite hriselna ngaipawimawhin kawng hrang hrangah Health program kalpui anih thu a sawi a. District mipuite chu Mizoram Health Care Scheme hnuaia hamthatna awmte hmelhriata chhawr tangkai tum turin a chah a. Health Care Scheme hnuaia inziahluh hun chu March thla ni 31, 2020 thlenga hawn anih thu leh mahni veng Health Sub-Centre theuhahte inhriattira zawtfiah turin a chah a ni.

Dr. R. Lalawmpuia, CMO Champhai chuan kalkhawmte lawmna thu a sawi a. Pi C.Lalramengi, District Programme Manager, NHM chuan lawmthu sawiin hun a khar a ni. Hemi hnu hian World Hearing Day pualin Beng ri hriatna lama harsatna neite tan ‘Free Hearing Clinic’ neih chhunzawm a ni a, Beng ri hriatna thalo mi 20 te an inentir a ni. Khuallian Pu Mark Lalthanliana chuan Champhai District Hospital hmunhmate tlawhin hmanraw neihte a enfiah nghal a ni.

Mizoramah January 2019 atanga January 2020 chhungin mi 25,431 te Beng endikna atangin mi 12,781 ten Beng lama harsatna an nei tih hmuhchhuah a ni a. Heng zinga mi 3,262 te chu ri hre tha thei tawhlo Bengngawng kan tih te an ni a. Mi 1,047 te chu Beng dar, Hearing Aid vuah tura tih an ni a. Mi 217 te Beng zai sak niin, Beng natna tlakbuak mi 10,208 awmin, mi 4,600 te Beng chu zirbing sak an ni bawk. NPPCD Champhai Report, January 2019-February 2020 thlenga tarlan dan chuan Beng entir mi 4,043 zinga mi 1,375 te chuan Beng lama harsatna an nei tih hmuhchhuah a ni a, mi 385 te chu Bengngawng niin, mi 133 te Beng dar vuah tura tih an nih bakah mi 626 te Beng chu zirchian sak an ni.

Attachment

  • Loading attachment...