Vawiin chawhma khan National Programme for Prevention and Control of Deafness bultumin District Hospital, Kolasibah ‘Hearing for Life, Don’t Let Hearing Loss Limit You’ tih thupui hmangin ‘World Hearing Day’ hman a ni a, he ni pual hian Free Health Camp neih nghal a ni bawk.

Free Health Camp hawnnaah hian Dr Hmingthanmawii, CMO chuan, ri hriat nana pawimawh tak, kan beng chu uluk tak a kan enkawl a tul zia leh hunbi mumal tak a damdawi in a mithiamte endik tir thin a pawimawh a sawi. Dr Hmingthanmawii chuan, ri hriatna a chaklo avang a nitin a kan nunphung a tihbuai theih dan te tarlangin, enkawl vat a nih loh chuan harsatna nasa zawk a thlen phah theih thu te a sawi a. A hun tak a enkawl a nih chuan enkawl dam theih a nih thu leh a chhe zel tur te ven theih a nih thu a sawi bawk.

He hun hi Dr Robert Lalfakzuala, District Medical Superintendent in kaihruaiin District Hospital Kolasiba ICU leh Beng lam entirna hmun tur bik, Sound Proof room neih theih nan hmalakna a kal mek thu a tarlang a. Dr Vanlalbuatsaiha, MO, NPPCD in World Hearing Day hman dan tlangpui sawi zauna hun te neiin Pi Malsawmkimi, Hearing Instructor-in beng enkawl dan inhrilhriatna hun a hmang bawk a ni.

World Hearing Day hi District Hospital, Kolasibah hian kum 2017 atanga hman tan a ni a, a mamawh te tan beng endikna khawl, Puretone Audiometry hmang a beng endik sakna hun leh a thlawn a inentirna hun buatsaih thin niin bengdar mamawh te chhinchhiah a, a tul ang a hmalakpui thin an ni bawk. Vawiin Kolasib district hospital-a Wolrd Hearing Day pual a Health camp neih ah hian mi 50 chuang an in entir a ni.