No.5516/2020-2021

Dated Champhai, the 28th September, 2020: AH & Vety Department leh Mizoram State Veterinary Council (MSVC) te tangkawp chuan vawiin khan World Rabies Day 2020 pualin AH & Vety Complex, Champhaiah hun an hmang a, he hunah hian kar khat chhung awh tur a thlawna Ui a hri danna Anti Rabies Vaccine (ARC) pekna tur ‘Anti Rabies Vaccination Week’ chu bultan nghal a ni. Kumin Word Rabies Day-ah hian Ui a hri nuaibo tura kan zavaia thawhho a pawimawhzia leh Ui zawng zawng Ui a hri danna pek vek a tul zia zirtir uar niin, ‘End Rabies: Collaborate, Vaccinate’ tih chu thupui thlan a ni.

He ni puala hun hmanah Dr.B.Zonghinga, District AH & Vety Officer chuan thusawiin, Ui a hri tihbaiawm tak nuaibo anih theihna turin AH&Vety Department-in theihtawp chhuaha hma a lak thu leh World Rabies Day chu khawvel pumah September Ni 28 ah hman thin anih thu a sawi a. Champhai District-a Ui vulh te’n Ui a hri Rabies an kai lohna turin a tul anga hmalak zel anih thu pawh sawiin, World Rabies Day denchhenin a thlawn vekin Ui a hri danna Anti Rabies Vaccine karkhat chhung an pek dawn thu a sawi a. Ui a hri danna pek runpui chu bultanin a hawng a ni.

World Rabies Day hi Rabies Vaccine (Ui a hri danna) siam chhuaktu French Scientist, Louis Pasteur-a thih champha hriatreng nan khawvel pumah kum 2007 atangin kum tin September Ni 28 ah hman thin a ni a. He niah hian Ui vulh dan leh Ui a hri chungchangte, nuaibo anih theihna tura tul hrang hrangte inzirtirna leh Ui a hri danna pek nante hman thin a ni. District AH&Vety Office, Champhai chuan vawiin September Ni 28 2020 atanga October Ni 3, 2020 thleng hian a thlawnin Ui a hri danna an pe dawn a, Ui vulhtu zawng zawngte chu he hun tha hi chhawr tangkaia Ui a hri nuaibo kawnga theihtawp chuah puiah AH&Vety Department chuan a sawm nghal a ni.

Vawiin World Rabies Day 2020 denchhena Anti Rabies Vaccination Week tanniah hian Ui 20 te Ui a hri danna Anti Rabies Vaccine (ARC) pek an ni.