3920/2022-2023

Champhai, the 22nd March, 2023: Project Management Unit (PMU), PHE Department leh District Water & Sanitation Mission (DWSM), Champhai District tangkawp buatsaihin tukin dar 6:45 khan I&PR Auditorium, Champhaiah 'Khawvel Tui Ni', World Water Day 2023 pual inzirtirna hun hman a ni a; hemi hnu hian World Water Day denchhenin tui humhalh leh renchem a pawimawhzia inzirtirna kawngzawh World Water Day Rally chu CHANEM Building atanga Circuit House thleng neih a ni. He hun hi District Bawrhsap Pu James Lalrinchhana, Chairman, District Water & Sanitation Mission (DWSM) chuan khuallian niin a hmanpui a ni.

Khuallian District Bawrhsap Pu James Lalrinchhana chuan District mipuite World Water Day 2023 pual chibai a buk a. Khuarel mawina leh Pathian thil thlawn pek hrang hrangte humhalha tihpun a tul thu sawiin, kalkhawmte chu a tha zawnga danglamna thlen tura anmahni atanga bultan theuh tum tur leh, vawiin ni mai nilo kumtluana world water day hmang turin a fuih a. Khawvel pumah mamawh khawp tui dawng phalo mi maktaduai hnih bawr vel an awm thu tarlangin, Champhaiah ngei pawh tun hma lam ngaihtuahin tui hnate a tlem zel thu leh, khawpui tui tlan ber khawchhak Tuipui hna leh tui luang zat pawh a tlem tial tial thu a sawi a. Tui harsatna tawh chhoh mek kara Jal Jeevan Mission (JJM) hnuaia PHE Department hmalakna hmanga District chhung hmun hrang hranga tuilakna leh in tina tui pekna project kalpui a ni chu lawmawm a tih thu a sawi bawk.

DWSM Chairman ni bawk chuan tui, faina leh hriselna te chu nghet taka an inkungkaih tlat thu leh lakhran theih loh tluk an nih thu sawiin, tui thianghlim tel lovin faina a awm thei lova, faina tel lovin hriselna a awm thei lo a ni, a ti a. Nakin zela kan tu leh fa lo la awm turte tana chenna tlak ram nuam, mamawh khawp tui thianghlim awmna hmun kan hnutchhiah theih nan khawmuang tawh lovin tun atangin hma i la tlang ang u, tiin kalkhawmte a sawm a. Nitin khawsak kawngah leh hmasawnna ruhrel siam kawngahte tui a pawimawh thu leh a tel lova kal a theih loh thu sawiin, Sustainable Development Goals zingah pawh tui leh faina kawnga hmalakna a tel thu a sawi a. Kawng hrang hrangah rualelna dik nei chunga hmalak a pawimawh thu pawh sawiin, heng zingah hian tui renchem pawh thil hote anga lang nghawng thui tak nei a ni a, hemi a nih avang hian tui hman tulna angahte pawh renchem taka kan hman thiam a pawimawh a ni, a ti a. Tuihna siamtu ramngaw humhalh leh tui awmna hmunte humhalh a tul thu bakah tui renchem a tul thute inzirtirna tam zawk neih a tul thu a sawi bawk a. World Water Day puala hun hman chuan tui leh tuihna humhalh a tul ziate, tui chu mihring bakah thing leh mau leh nungchate innghahna ber a nih avanga renchem angaih zia mipuite thinlungah a tuh ngei a beisei thu a sawi bawk.

He hun kaihruaitu Er. Z.D. Dengthuama, EE PHED & Member Secretary, District Water & Sanitation Mission chuan sik leh sa inthlak danglam nasa tak avangin khawvel hmun hrang hrangah tui indaihlohna namenlo a thlen thu sawiin, van ruahtui tla kan la dawng thin chu kan vanneihna a ni, a ti. Tui hna humhalh kawngah tih theih kan neih vek avangin mimal tin atanga intan, a bulthum atanga hmalakna kan ngaih pawimawh tlan a tul hle a ni, a ti bawk.

Thusawitu dang Sub-Hqrs. YMA (SYMA) Champhai President Pu F.Lalrinmuana chuan thiamna leh theihnate hriselna kawnga hmasawn nana hman a pawimawh thu sawiin, hriselna tha nei turin tui thianghlim mamawh khawp kan neih a ngai a ni, a ti a. Tuihna tlem zel avanga harsatna tawh hrang hrangte tarlangin, kalkhawmte chu an tel lova kan awm theih loh tuihna siamtu ramngaw mai bakah nungchate humhalh tlat turin a sawm a. Tui renchem leh faina kawngah midangte zirtirtu nih tum theuh turin a sawm nghal bawk.

He hunah hian Pi Julie C.Mawii, District Coordinator, JJM, Champhai District kaihhruaiin tui renchem leh faina kawnga theihtawp chhuah tura intiamkamna sawi rual a ni a. Er. Vanlalmuanawma, SDO, PHED Champhai Project Sub-Division-in lawmthu sawiin hun hman a khar a. Hemi hnu hian World Water Day pual inzirtirna kawngzawh District Bawrhsap Pu James Lalrinchhana'n a vai liam a; Rally hi CHANEM Building atanga Circuit House thleng neih a ni.

Kum 1992 khan United Nations General Assembly chuan khawvelah hian tui duhkhawp leh thianghlim a awm zel theih nan tui awm sate awmze nei taka hman a tulzia leh, chumi kawnga mi zawng zawng lungrual taka kan thawh ho theihna turin March ni 22 hi World Water Day atan a ruat a, kum 1993 atang khan khawvel pum huapin he World Water Day hi hman tan a lo ni ta a ni. Kumin hian invawn thianghlim lam hawi huam telin thupui hman a ni a, thupui chu 'Accelerating Change' tih a ni a. Kumin World Water Day campaign auhla ber tur chu tui leh invawn thianghlim kawnga hun khirh lai sut kian zel (solving water and sanitation crisis) tih a ni.

Vawiin World Water Day 2023 pual hun hmannaah hian JJM & SBM (G) Implementation Supportinh Agency (ISA) te, Sub-Hqrs. YMA Champhai hruaitute, Govt. Champhai College (GCC) Zirtirtu leh Zirlaite an tel a ni.