3921/2022-2023

Aizawl the 22nd March 2023: Vawiin khan Deputy Chief Minister leh UD & PA Minister ni bawk Pu Tawnluia chuan Edenthar community hall-ah Aizawl Smart City Project hnuaia sak tur Edenthar Playground lungphum a phum.

Deputy Chief Minister Pu Tawnluia chuan Smart City hnuaia playground changtlung leh tha tak tur lungphum phum a ni chu lawmawm a tih thu a sawi a. Playground tha tak neih kawngah Sawrkar chang nilo Edenthar mipui leh khawtlang hruaitute an tanrual thu sawiin Bialtu MLA remhriatna leh inpekna pawh fakawm a tih thu a sawi. Pu Tawnluia chuan playground chu Mizo thalai leh infiam mite chawikang tu ni se, National leh International level-ah pawh Mizote hming chherchhuaktu a nih ngei theih nan tangkai taka hmang turin a fuih bawk. Veng mipuite pawh fuihin neitu thinlung pu a; a enkawlna kawngah theihtawp chhuah fo turin a chah a, Edenthar playground chu Zoram mipuite huapzo, veng hran leh khaw dang tha taka lo dawngsawngtu ni thei tura enkawl turin kalkhawmte a chah a ni.

Bialtu MLA Pu C.Lalmuanpuia pawhin thu sawiin dawhthei taka an lo thlir thin playground lungphum phum a ni ta chu ropui a ti a; harsatna hrang hrang kar a a hlawhtlin theihna tura theihtawp lo chhuah thinte chu lawmthu a hrilh bawk a ni. Tangkai taka mipuiten an hman theih nan leh thalai ten hlawhtlinna atana an hman chu a duhthusam a nih thu a sawi.

Vawiin programme ah hian Rev. C.Rualchungnunga’n hunserh a hmang a, Pu Lalmalsawma Pachuau, Secretary UD & PA in welcome speech sawiin Pu T. Lalramliana, Chairman, Local Council Edenthar in lawmthu sawina neiin hun a khar a ni.

Edenthar playground tur hi Aizawl Smart City Limited hnuaia sak a ni a, play area tur chu 90 m X 45 m niin Astro turf phah a ni ang. A Project cost tura ruahhman chu Rs. Vaibelchhia 8.18 a ni.