3922/2022-2023

Champhai, the 22nd March, 2023: Vawiin chawhma dar 11 khan Champhai DC Conference Hall-ah District Sports Committee din dan tur chungchang ngaihtuahin Bawrhsap Pu James Lalrinchhana hovin inrawnkhawmna neih a ni a; District Sports Committee hnuaia post ruak hnawhkhah ngaite chu April ni 25, 2023 ah inthlanna buatsaiha siamfel nise tih a ni.

Meeting kaihruaitu District Bawrhsap Pu James Lalrinchhana chuan Champhai District-ah Sawkarin inkaihhruaina a siam dungzuia District huap Sports Committee din a ni thei tur chu lawmawm a tih thu sawiin, Champhai District tana bung thar kaina pawimawh tak a ni, a ti a. Ramri depa awm District pawimawh tak Champhai District-ah zirna, hriselna leh infiamna te thil dang ngaihthah chuang lova ngaih pawimawh zual bik a nih thu a sawi a. Infiamna tih hmasawn kawngah pheikhai rual taka hmalak a tul thu sawiin, Sports Association hotute chu theihtawp chhuahpuiah a sawm a; infinchhuah a tulna zawnah pawh inthlahrung hauh lo turin a sawm a. Champhai District chhungah recognised Sports Association 30 an awm thu sawiin, association hrang hrangte nung taka an kal theih nana intuaithar leh inchhawmnun zel a tul thu a sawi bawk.

He hunah hian District Sports Committee din thuai a nih theih nana hmalak tul hrang hrangte sawiho a ni a. Mizoram State Sports Council (Formation and Functioning of District Sports Committees) Regulations, 2022 chungchangte ngun taka zirchian a nih hnuah, District Sports Committee hnuaia Sports Association-te chanpual post hnawhkhah ngai Sr. Vice Chairman, Vice Chairman leh Asst. Secretary-te thlan hun atan April ni 25, 2023 chu ruat niin, I&PR Auditorium-ah chawhma dar 11 ah inthlanna neih nise tih a ni a. Post ruak hnawhkhah ngai chuh thei tur Sports Association President theuhte chu election notification chhuah a nih veleh an chuh duh a nih chuan hun tiam chhunga Chairman hnena nomination thehlut tura tih an ni.

District Sports Committee hnuaiah hian Sawrkar inkaihhruaina siam dungzuiin Chairman atan Deputy Commissioner, Secretary atan District Sports & Youth Officer (DSYO), Fin. Secretary tur Mizoram State Sports Council (MSSC) in a ruat dawn bakah, Ex-officio member Line Department hrang hrang 8 aiawhte an tel dawn bawk a ni.

Thukhawm chuan District chhunga Sports Association hrang hrangte chu a tul anga intuaithar turin a chah a. Sports hmunhma cheithat ngai leh venhim tulte pawh tarlan niin, New Champhaia District Sports Committee hmunhma leh Tlangrawta Boxing Hall hmunhmate remchang hmasa berah enfiah nise tih a ni a. Sports Association aiawh te'n report an pe a; Champhai District chhunga Sports tih hmasawn kawngah lungrual taka hmalak zel nise tih a ni bawk.