3923/2022-2023

Champhai, the 22nd March, 2023: Vawiin chawhnu dar 1 khan kum tling lo chunga nupui-pasal neih ven kawnga hmalakna 'Prevention of Child Marriage' chungchang ngaihtuahin Champhai District Bawrhsap Pu James Lalrinchhana, Child Marriage Protection Officer ni bawk hovin DC Conference Hall-ah meeting neih a ni.

District Bawrhsap Pu James Lalrinchhana chuan Sawkarin kum tling lova nupui-pasal neite a ngaimawh thu sawiin, India ram hmun dang dangahte naupang kum tling lova inneihtir an awm thin chu dan phal loh a nih thu a sawi a. Kum tling ngeia nupui-pasal neih thatna leh kum tling lova nupui-pasal neih avanga harsatna thleng thinte inzirtirna neih tam a pawimawh thu a sawi a. Dan phal loh tihrem kawnga tanrual puiah kalkhawmte a sawm a ni.

Pu Lalrinmuana, District Program Officer, Women & Child Development Department chuan India rama hmalaknate khairual taka kalpui thin a nih avangin Mizoramah Child Marriage chungchanga hmalakna pawh Sawrkar laipui duhdan anga kalpui a nih thu a sawi a. Child Marriage chungchanga awareness campaign neih tawh dante a tarlang bawk a. Sawm bik kalkhawmte chu tawn hriat nei tura ngaih an nih avangin inrawnkhawmna chuan rah tha a chhuah ngei a beisei thu a sawi bawk.

He hunah hian danin innei thei tura a ruat, mipa kum 21 chin leh hmeichhia kum 18 chin chungchangte sawiho a ni a. A tlangpuiin India ram hmun danga thleng thin naupang inhualna leh inneihna awm thinte Mizoramah a awm lem loh thu tarlan a ni a. Sawkar dan dinglaiin dan anga innei thei tura kum a bithliah zat, mipa kum 21 leh hmeichhia kum 18 chinte zawma kumtling ngeia an inneih theih nana hmalak dan turte rel a ni a; kohhran hrang hrang, NGO leh zirna inahte hemi hawi zawnga hma an lak tawhnaah lawmthu sawi a, theihtawp chhuah zel tura ngenna siam nise tih a ni a. Heng bakah kum tling lova nupui-pasal neih Child Marriage-in nghawng thalo a neihte inzirtirna tam zawk, hmalak theih dan hrang hrang kaltlanga neih nise tih a ni bawk.

He hunah hian Line Department hnuaia thawktute bakah Child Welfare Committee, Champhai member-te leh Kohhran hruaitute an tel a ni.