3924/2022-2023

Lunglei the 22th March" 2023: Ni 21-23, March 2023 chhung awh tur Sertlangpui Group YMA inkhawmpui vawi 31-na chu S. Lungdai Community Hall ah hman a ni . Vawiin inkhawmpui nihnihna ah hian Agriculture, Cooperation leh Irrigation & Water Resources changtu Minister leh bialtu MLA ni bawk Pu C. Lalrinsanga chuan khuallian niin a hmanpui. Sertlangpui Group YMA inkhawmpui vawi 31 na thupui atan Ram leh Hnam humhalh tih hman a ni.

Sertlangpui Group YMA inkhawmpui vawi 31 na hun hi Pu Rosiama Sailo , Vice President, Sertlangpui Group YMA chuan kaihruaiin Agriculture Minister Pu C. Lalrinsanga chuan pawl huapzau leh zahawm , Zofate min khaikhawmtu pawl ropui tak YMA kan nei hi kan vannei tak zet a ni tiin kalkhawm te chu Sertlangpui Group YMA inkhawmpui vawi 31 na chibai a buk a. Inkhawmpui thupui Ram leh Hnam humhalh tih chu a ngaih pawimawh takzet thu sawiin Pu C. Lalrinsanga chuan hemi kawng a pawimawh ber chu mitin mahni hna theuh taima taka kan thawh a, intohdelh tura theitawp kan chhuah tlan hi a ni a ti a. Khawvel thang chho zelah leilung hausakna , thing leh mau te kan ti chereu nasa hle a, tui hna kan ti kang chat a, kan ram kan tih chhiat tawh siam tha leh turin theihtawp a tan lak a tul a ni tiin hemi kawng ah Agriculture Department hmalakna leh sawrkar hmalakna hrang hrang te lo tawiawm turin mipuite a sawm a ni. Thalaite nun khawih buaitu ruihlo do kawngah nasa taka hmalak a ngaih thu sawiin zirna lam a hma kan sawn theih nan theitawp chhuah turin YMA member kalkhawmte a chah a ni. Nupui pasal neih kawng ah fimkhur a, hnamdang nupui pasala nei lo tur in a duh a, rinawmna leh taimakna vawng nunga zel turin a chah bawk a ni.

Sertlangpui Group inkhawmpui vawi 31 na ah hian member kalta te sunna hun hman niin malzai, quiz, YMA hla inelna, games leh rorelna te neih a ni bawk.